Shillong, Nailur 08: Ka jingshah leh bein jong ki ASHA ha kane ka jylla kala long ym tang na ka liang jong ka sorkar hynrei kum juh wat ha ki bor shnong ruh kumjuh ha kaba bun sien kila shu shah weng khlem daw na ka kam kaba ki trei.
Ka kong Mira June Myrsing general secretary jong ka seng haba kren ha ki lat pathai khubor mynta ka sngi kala iathuh ba kum ka seng kam lah shuh ban shu sngap dei halor kane ba mynta ka sngi kila wan ai da ka jingthoh sha u myntri ba dei peit ia ka tnad ka koit ka khiah u Bah AL Hek ban pan jingia na ka sorkar.
La iathuh ba kane ka jingshah weng kam khah khah jong ki nongtrei ASHA ka jia la jan ha baroh ki bynta jong ka jylla hynrei haba kila ia kren la lah ban ia pynbeit hynrei kaei kaba la jia hapoh jong ka shnong Mawkhun kha ha u bnai ba la dep kaba hap hapoh jong ka Umsohping PHC kaba hap hapoh Mawsynrut C&RD Block.
Ha kane ka shnong ka kong Philadelphia Sohmat kala shah weng jubor na ka kam ASHA bad ha ka jaka jong ka la thung ia ka kurim jong u secretary ka Village Employment Council, na ka liang jong ka Meghalaya ASHA Union Workers kala leit sha katei ka shnong ban ia kren ia sngewthuh jingmut hynrei ka long mar khongpong.
Ka daw kaba ki la lap ka long ba ka dei na ka pisa NERGS, la iathuh ba ia ka skhim NERGRS hapoh katei ka shnong kila phah tih da ki JCB bad ki shna pat ia ka jingsiew sha ki paidbah bad haba la wan ka pisa ka kong Philadelphia ka dang mut ba dei ka pisa na ka kam ASHA kala leit ban sei bad ha dien ba la tip ba ka dei na ka ka skhim NERGS kala leit ban pynphai hynrei kim treh shuh.
Na ka liang jong ka seng MAUW ka pynrem jur ia kane ka jingleh jong katei ka shnong bad halor kane ka jingleh jong katei ka shnong ka dawa na ka sorkar bad kham tam eh na ka tnad ka koit ka khiah ban ai ka jingiada ia ki nongtrei ASHA namar ba ki shah pynkhein jubor bad shah weng na ka por sha ka por.
