Shillong, Nailur 27: U myntri rangbah ka jylla u Conrad K Sangma haba jubab ia ka jingpan jingpynshai jong u Bah George B Lyngdoh ha kaba ia dei bad ka jingdon kita ki par mawshun ba la tih deain ha Amlarem, na ka liang jong u myntri rangbah u la ong ba ha dien la ioh jingtip la phah ia ki ophisar ba kin leit jurip bad la ioh ruh ia ka kaiphot bad ha ka 25 tarik mynta u bnai la phang khyrdep ia kine ki par mawshun ba trei beain.
U myntri rangbah ka jylla u la ong ba la phah ia ka ophis jongu DFO Jowai ban leit ban jurip ha ka 21 tarik mynt bnai bad ha kane ka jingleit jurip la shem ba ki don 11 tylli ki par mawshun ba la shu trei beain bad na ka liang jong ka ophis kala ai ia ka kaiphot sha ka sorkar bad ha ka 25 tarik mynta u bnai la phang khang khyrdep ia ki.
Haba ia dei bad ki paw mawshun kiba la ioh ia ka mining lease ha West Jaintia Hills kiba la ai na ka sorkar ki long 11 tylli. Ka sorkar ka sngewthuh ba ym dei ban pynjot pathar ia ka mariang bad ha ka juh ka por ymd ei ban ktah ruh ia ka ioh ka kot bad ia kane hap ban ia peit lang na baroh ki liang.
La bethah ia baroh ki tnad sorkar kiba ia dei bad kane ka kam ba kin ia treilang ban khang ia kine ki par mawshun ba la pyntrei beain, na duh ka tnad khlaw, ka JHADC, ki bor jong ka District bad kum juh ki bor pulit.
Haba ia dei bad ka jingkdew jong u MLA ka Umroi ia ka jingdon ki shallan thok na ka liang jong u myntri u la ong ba ki shallan kiba don mynta ki briew ki lah ban shna tuh ia ki ban lait na kane ka jingiadie ia ki shallan thok ka sorkar mynta kala pynkhreh ban shna thymmai ia ki shallan kiba katkum kane ka juk kaba mynta.
U myntri rangbah u la pynpaw ia ka jingsngew nguh ia u MLA ka Umroi u ba la wanrah ia ka jingkwah jingpynshai halor kane ka jingmih khubor, ha ka juh ka por u la ong ba ka long kaba bha ba ki MLA, ki riew paidbah kin ai jingtip sha ka sorkar ia kaei kaba ki lap ki shem khang ba ka sorkar kan lah ban pynbeit.
