Shillong, Jymmang 23: Ka jingkhlad noh jong u Bah Various Star Nongsiej u wei na ki nongthoh khubor ba la slem jong ka jylla Meghalaya kala wanrah ia ka jingduh kaba khraw ia ki para nongthoh khubor bad ia ka jylla.
Halor kane ka jingkhlad jong u bah Nongsiej ka MEPA kala pynlong ia ka jingialang kaba kyrkieh ban pynpaw ia ka jingsngewsih halor kane ka jingkhlad jong u wei na ki nongthoh khubor ha kane ka jylla. Na ka liang jong ka seng ki trai kot khubor kila phah ia ka jingsngewlem halor kane ka jingkhlad u Bah Various Star Nongsiej Executive Editor ka kot khubor Kynjatshai.
Ha kane ka sngi na ka liang jong u kynhun ki nongthoh khubor ka Shillong Press Club ruh kala pynlong ia ka jingialang ba kyrkieh ban pynpaw ia ka jingsngewsih halor kane ka jingkhlad jong u Executive Editor jong ka Kotkhubor u Kynjatshai bad na ka liang jong ka SPC ruh kala phah ia ka khubor sngewlem ka kurim bad kiba ha iing ha snem, ka jingkhlad jong u Bah Various Star Nongsiej ka long ka jingduk kaba khraw ia ki para nongthoh khubor.
Halor kane ka jingkhlad noh jong u Bah Various Star Nongsiej u myntri rangbah ka jylla u Conrad K Sangma, bad u nongialam ka liang pyrshah u Dr Mukul Sangma kila phah ia ka khubor sngewlem sha kiba ha iing ha sem bad ki duwai ba ai u Blei trai kynrad un ai ka jingjah thiat bym juhkut.
U Symbut Myntri Rangbah ka jylla u Bah Prestone Tynsong ha ka kyrteng jong ka sorkar u la phah ia ka khubor sngewlem halor kane ka jingkhlad jong u bah Various Star Nongsiej u wei na ki nongthoh khubor bala rim jong ka jylla bad duwai ba ai ka mynsiem kan ioh ia ka jingjahthait bymjuh kut.
U Bah Various Star Nongsiej u la sdang ia kane ka kam thoh khubor ha u snem 1993 bad u Mawphor, ha dien u la shimti ia kane kam Editor hapoh ka kotkhubor Peitngor bad kum u Editor ka kot khubor Kynjatshai bad ha duh ba u khlad u don bad ka kot khubor Kynjatshai kum u Executive Editor. Ka jingleit ontep kan long ka shai ka sngi ha ka por 2.00 baje noh phai sngi.
