Shillong, Naitung 21: Ki volunteer jong ka seng nongrep, Hill Farmers Union (HFU) ha kine ki khyndiat sngi ki la phah pynphai noh ia kiba bun ki briew kiba thmu ban leit die jingdie bad leit thied jhur na ka Iew dielang ha Parking Lot pyrshah Anjalee Cinema Shillong namar ka jinglap ba ki don ka jingshit kaba long palat 37 ha ka jingthew lyngba ka thermal scanner.
Haba iakren bad u bah Commander Shangpliang President jong ka HFU u la iathuh ba, hadien ba ka Deputy Commissioner (DC) jong ka East Khasi Hills District ka la phah khang noh dangshen ia ka Iew die lang namar ka jingbym lah ban pynbiang ia ka jingiajngai uwei ia uwei pat (Social Distancing), ka seng ka la phah ia ki dkhot jong ka seng ba kin long ki volunteer ba kin iarap ban hikai bad bthah ia ki paidbah nongrep, ki nongkhaii bad ki nongthied ba ki dei ban bud ryntieh ia ka social distancing ha katei ka jaka.
U bah Shangpliang u la iathuh ba ka long shisha kaba eh ban pynbiang ia ka social distancing ha iew die lang hynrei wat la katta ruh na ka liang jong ki dkhot ka seng ryngkat ki nongtrei kiba ap parking kali ki la pyrshang katba lah ban bud ryntieh ia kane khnang ba yn lait na ka jingshah khang biang ha ki bor district.
Ha kawei pat ka liang u la iathuh ba na ka liang jong ka seng kum kawei ka lad ban iada na une u khniang jingpang covid 19, ka HFU ka la phah ruh ban test lyngba ka thermal scanner ia ki briew kiba wan rung ha katei ka iew dielang bad ha kine ki sngi la pynphai biang bad ym shym la shah rung ia kiba bun ki briew namar ka jinglap lyngba ka mashin kaba pyni ba ki don ka jingshit ka bym biang (normar).
U bah Commander Shangpliang u la kyntu ia ki nongrep, nongkhaii bad kumjuh ia ki paidbah kiba wan thied jingthied ba kin sngewbha ban iatreilang bad ka seng bad khamtam bad ka sorkar da kaba bud ryntieh ia ki jingbthah jong ka sorkar khnang ba yn lah ban iada na une u khniang jingpang bad ban lait na ka jingshah khang biang jong kane ka iew dielang kaba dei ka pliang ja jong kiba bun ki nongrep bad ki nongkhaii ruh kumjuh.
