Phah noh ka  KSU ia palat 100 ngut ki nongbylla bym biang ‘work permit’ na Mawbah

Shillong, Jymmang 25: Ka seng Khasi Student’s Union (KSU) Mawprem Circle mynta ka sngi kala phah noh ia palat 100 ngut ki nongtrei bylla ki bym shym la pynbiang biang bad don ia ka work permit ne ki kot ki sla kiba biang.

Ka seng hapoh ka jingialam jong u samla Arristone Thabah President, KSU Mawprem Circle bad u samla Sam Shylla General Secretary ka KSU Mawprem Circle ka la pynlong ia kane ka jingkhynra ia ka work permit hapoh jong ka shnong Mawbah.

Ha kane ka jinghiar khynra ia ka work permit na ki nongbylla bar jylla ha kylleng ki jaka trei kiba don hapoh u pud u sam ba khmih da ka Circle, ka seng ka la lap ba jan baroh kiba trei bylla kim shym la don satia ia ka work permit.

Kumta hadien ba ka la lap ba kim don ia ka work permit ne ki kot ki sla ba biang ka la bthah ba kin mih noh na kane ka jaka bad ban leit phai noh sha la ki shnong na kaba ki wan.

Na ka liang jong u President samla Arristone u la ong ba kane ka jingkhynra jong ka seng ka dang dei tang ka jingsdang bad nangne shakhmat na ka liang ka seng kan sa iai bteng ban pynlong ia kum kine ki jingkhynra ia ki nongbylla bar jylla ha ki jaka bapher bapher ba hap hapoh ka jingpeit jong ka circle.

U la ong ruh ba ka seng ka la dawa na ki kontraktor ne ki briew kiba pyntrei ia ki kam bapher bapher hapoh u pud u sam jong ka circle ba ki dei ban pynbiang ia ki kot ki sla bad baroh ki jingdonkam jong ki nongbylla ki jong ki bad lada kim lah yn nym ailad satia ia ki briew ba kin trei ne pyntrei ia kino kino ki jingtrei.

 

 

What Next?

Recent Articles

Leave a Reply

Submit Comment

*