Shillong, Lber 15: U IG jong ki BSF u PK Dubey u la ong ba ka jingpyrkhing jong ka sorkar Assam ia ka jingkhaii masi tuh sha Bangladesh kala pynlong ia ki nongkhaii ba kin phai khmat sha kane ka jylla Meghalaya namar ba bun ki jaka ki dang sah khlem pat ker ksainar shiah ha khappud bad ka Bangladesh.U tei u heh jong ki shipai BSF, u la ong ba kane ka jingjyllei kane ka kam khaii masi tuh na Meghalaya imat ka dei na ka daw jong ka jingpyrkhing ka sorkar Assam bad kumba ka long mynta ki jaka kum na Garobadha, Ampati, Purakhasia ka jur bha kane ka jingkhaii masi tuh namar ki don ki iew die masi ha khappud bad ka Bangladesh.La ong ba ha u snem 2015 ka jingioh kem ia ki masi ba thmu ban die sha Bangladesh ka long tang 2,064 tylli bad kane ka long na ki 261 ki jingioh kem bad la ioh ban kem 20 ngut ki nong India kiba khaii masi tuh. Hynrei ha u snem 2016 ka jingioh kem ia ki masi ka la kot sha ka 3,543 tylli bad la ioh ban kem 33 ngut ki briew kynthup ia saw ngut ki khar Bangladesh.Hynrei mynta u snem 2017 tang ha kine ki ar bnai shiteng la ioh ban kem haduh 2151 tylli ki masi na ki 240 ki jingjia la kem 9 ngut ki briew bad u wei u nong Bangladesh. Kaba la pynlyngoh ba wat la ka bai jamin ia ki nongkhaii masi la pynkiew haduh T.20 lak ruh kim salia ki dang iai bteng ia kane ka kam khaii masi tuh.
Kane ka jingbym lah ban ker ksainar shiah ha khapppud bad ka Bangladesh kala buh ia ki shipai BSF ha ka jingeh kaba khraw ban ia khun pyrshah ia kane ka jingkhaii masi tuh sha ka ri Bangladesh lada ka long ha kane ka rukom ka jingkhaii masi na Meghalaya kan dangkiew lada wan lei sha kane ka por slap, la ong u tei u heh jong ka BSF.
Mynta ka sngi ki shipai BSF kila ioh ban kem haduh 41 tylli ki masi na Gopinathkilla hapoh jong ka South West Garo Hills, hynrei namar kane ka kam ka long ha ka por jan miet kine ki nongkhaii tuh kila ioh ban phet krad na ka kti jong ki BSF da kaba shim ia ka kabu ban rih ha ki khlaw.
