plie ia ka prokram ai dawai COVID-19 ha kylleng ka ri da u Myntri Rangbah duh ka Ri U Modi

New Delhi, K. Lyngkot 16: U Myntri Rangbah duh ka ri, u Narendra Modi u la plie ia ka prokram ai dawai COVID-19 ha kylleng ka ri lyngba ka video conferencing mynta ka sngi. Kane kalong ka prokram ai dawai kaba heh tam ha pyrthei kaba kynthup ia ki jaka baroh jong ka ri. Baroh ki la don haduh 3006 tylli ki jaka ai dawai ha kylleng ki Jylla bad ki UT kaba la pyniasoh lyngba ka bor internet ha na ka bynta kane ka jingialang plie.

U Myntri Rangbah duh u la sdang ia ka jingkren jong u da kaba ai jingiaroh ia ki scientist kiba iadon bynta ha ka jingshna ia kine ki dawai. U la ong, bunsien ka shimpor da ki snem ban pynkhreh ia u dawai hynrei hangne, ha ka por kaba lyngkot, ym tang uwei hynrei ar tylli ki dawai ba la shna ha ka ri la ioh ban pyllait.

U Myntri Rangbah duh u la ai jingmut ia ki briew ba kidei ban long kiba phikir ban nym klet ban shim ia kine ki artylli ki dawai. U la ong ba kan don ka jingiapher kaba shi bnai hapdeng ki artylli ki jingioh dawai. U la bthah ia ki briew ban long kiba phikir wat hadien ba la ioh ia u dawai namar tang ar taiew hadien ba la shim ia u dawai ba ar, ka met jong u briew kan ioh jingiada na ka Corona.

U Myntri Rangbah duh u la batai shaphang ka jingiar jong ka jingai dawai Covid da kaba kdew ba ha ka bynta ba nyngkong hi, 3 klur ki briew, kaba long palat ia ka jingdon ki briew jong kumba 100 tylli ki ri jong ka pyrthei, ki la ioh dawai.

U la ong ba ia kane ka jingai dawai yn hap ban bteng sha 30 klur ki briew ha ka wat kaba ar ha kaba yn ai dawai ia ki riew tymmen bad ki briew kiba don lypa kiwei ki jingshitom ha ka met. U la ong ba ki don tang lai tylli ki ri- ka India, USA bad China kiba ka jingdon briew kalong palat 30 klur.

U Myntri Rangbah duh u ka bthah ia ki briew ba kim dei ban sngap ia ki khubor hamsaia namar ki scientist jong ka ri kiba pynkhreh ia u dawai, ki kam ai jingsumar nongpang, ka rukom treikam ha India bad ki rukom treikam ha ki jaka bapher bapher halor kane bynta kalong kaba la ioh jingshaniah na kylleng ki ri ka pyrthei bad ia kane ka jingshaniah la ioh lyngba ka jingiaid ryntih jong ki kam baroh.

U Myntri Rangbah duh u la ai khublei ia ka ri halor ka jingiatylli bad ka jingshlur ha ka jingiakhun pyrshah ia ka khlam corona. U la ong ba ka rukom iakhun ka India ia ka Corona kalong kadei lyngba ka jingskhem jingmut bad ka jinglah kyrshan dalade. U la kren shaphang ka jingkut jingmut ban nym pyntlot ia ka jingskhem jingmut ha manla ki briew jong ka ri.

U la iaroh shikatdei eh ia ka jingnohsynniang ki doctor, ki nurse, ki briew kiba trei ha ki kam ai jingsumar, ki nongniah jong ki kali kit nongpang, ki nongtrei ASHA, ki nongpynkhuid, ki pulit bad kiwei kiwei ki briew kiba don ha ki kam ialeh pyrshah ia kane ka khlam kiba la buh ia la ka jingim ha ka jingma ban iada ia kiwei.

Don katto katne na ki, kim bym leitphai sha la ki iing namar ki la duh noh ia la ka jingim ha ka jingiakhun pyrshah ia u khniang jingpang, la pynpaw u Myntri Rangbah duh. Ki briew kiba trei ha ki kam ban tehlakam ia kane ka khlam ki la wanrah jingkyrmen ha ka jinglong jingman kaba dap da ka jingsheptieng, hynrei mynta da kaba ai dawai nyngkong ia ki, ka ri ka pynpaw ka jingsngewnguh ia ka jingnohsynniang jong ki,la ong u Modi.

Haba kynmaw ia ki sngi ba sdang jong kane ka jingeh, u Myntri Rangbah duh u la ong ba ka India ka la pyni ka jinglong phikir bad ka la shim ia ki rai kiba biang ha ka por kaba biang. Ar taiew hashuwa ban ioh jingtip ia ka case ba nyngkong ha ka 30 tarik Kyllalyngkot, 2020 ka India ka la thaw ia ka High-Level Committee. Ka India ka la sdang ia ka jingpeit bniah shi snem mynshuwa naduh mynta ka sngi. Ha ka 17 tarik Kyllalyngkot 2020, ka India ka la pynmih ia ka jingbthah ba nyngkong jong ka bad ka India kalong napdeng ki ri ba nyngkong ban sdang ia ka jingscreen ia ki nongleit nongwan ha ki kad liengsuin

U Myntri Rangbah duh u la ai khublei ia ki para ri kiba la jop ia ka jingeh ban bat ia ki kyndon bad ka jingiai shah jong ki ha ka Janata Curfew. U la ong ba kane ka la pynkhreh ia ki briew jong ka ri na ka bynta ka jingpakhang dam. La kyntiew ia ka jinglong skhem jong ka ri da ki campaign kum ka taali- thali bad ka jingthang diya, la bynrap u Myntri Rangbah duh.

U Modi u la kren ruh shaphang ka jingiarap ia ki nong India kiba sahkut shabar ri. Ha ka por haba bun ki briew jong ki ri bapher bapher ki la sahkut ha China, ka India ka la iarap ym tang ia ki nong India hynrei ia kiwei kiwei ki nongshong shnong jong kiwei ki ri. U la kynmaw ia ka jingphah jong kawei ka laboratory sha kawei ka ri kaba shem jingeh ban test ia ki nong India kiba sahkut ha katei ka ri.

U Myntri Rangbah duh u la ong ba ka jingiakhun ka India ia kane ka khlam ka la ioh jingiaroh na kylleng ki ri ka pyrthei. Kalong ka nuksa jong ka jingiatylli bad ka jingiatreilang jong ka sorkar pdeng, ki jylla, ki sorkar ha ka thain, ki ophis sorkar, ki kynhun imlang sahlang, la pynkut u Myntri Rangbah duh.

Hadien ka jingaijingkren u Myntri Rangbah duh u la tweet, “Ka India ka la sdang ia ka #LargestVaccineDrive ha ka pyrthei. Kane kalong ka sngi jong ka jingsngewsarong, ka jinglehkmen ia ka jingtbit ki scientist jong ngi bad ka jingtrei shitom ki doctor, ki nurse, ki pulit bad ki briew kiba trei ha ki kam pynkhuid.

To ai ba baroh kin long kiba koit ba khiah bad kiba lait na ki jingshitom.” Da ka jingduwai Vedic ia ka koit ka khiah ha ka pyrthei,ka jingkmen bad ka jinglait na ka jingsngewsih.

What Next?

Recent Articles

Leave a Reply

Submit Comment

*