Shillong, Jymmang 17: Ka Myntri khynnah jong ka sorkar pdeng ba dei khmih ia ka tnat Social Justice and Empowerment, ka Pratima Bhoumik mynta ka sngi ka la plie ia ki kam jong ka Composite Regional Centre na ka bynta ka jingkyntiew ia ki sap, ka jingai jingiarap bad ka jingpynkupbor ia kito kiba don jingdunaha ki dkhot met ha Shillong.
Ia kane ka prokram ba la pynlong ha U Soso Tham Auditorium hangne, la iashim bynta da u Bah Kyrmen Shylla, Myntri sorkar Meghalaya ba dei khmih ia ka tnat Social Welfare, kaKong M AmpareenLyngdoh, MLA, Shillong East, Meghalaya bad ki heh ki hain na ka sorkarpdeng bad sorkar jylla.
Ha ka jingkren jong ka, ka Bhoumik ka la ong ba ka Sorkar ba ialam da u Myntri Rangbah Duh, u Narendra Modi ka la pyntreikam ia katto katne ki skhim na ka bynta ka bha ka miat jong kito kiba don jingduna ha ki dkhot met ha ka ri.
Ka Myntri khynnah ka la ong ba ka CRC ba dang plie thymmai kan ai ki jingshakri ia ki briew ba don jingduna dkhot met (Divyangjan) bad kyntiew ia ki sap jong ki briew ha Meghalaya.
Ka la ong ba ka sngewnguh ia ka sorkar Meghalaya kaba la ai 10 acre ka jaka ha Umsawli, East Khasi Hills district ban thaw ia ka iing paka na ka bynta ka CRC, bad ka la ong ba ia u maw nongrim na ka bynta kane yn sa thung ha kine ki por ban wan.
Ka la ong ba ka CRC kan wanrah ia ki jingiarap na ka bynta kito kiba don jingduna dkhot met bapher bapher bad kan ai ia ki jinghikai ban kyntiew ia ki sap jong kito kiba don jingduna dkhot met bad kan pllie lad ia ki ba kin ieng hala kijong ki kjat ha ka imlang sahlang.
U Bah Kyrmen Shylla, Myntri ka tnat Social Welfare jong ka sorkar Meghalaya, u la ong ba u sngewnguh ia ka tnat Social Justice bad Empowerment jong ka sorkar India kaba la seng ia ka CRC ha Meghalaya bad u la ong ruh ba u ngeit skhem ba kane kan trei ban pyndap ia ki jingdonkam jong kito kiba don jingdunaha ki dkhot met ha ka jylla.
U la ong ba u kyrmen ba kane ka CRC ba dang shu sdang kan ai jingiarap ia 21 tylli ki thup jong kito kiba don jingduna ha ki dkhot met bad kan pynlong ruh ia ki jingai jinghikai ia ki.
U la kren shaphang ka jingkut jingmut jong ka sorkar Meghalaya na ka bynta ka bha ka miat jong kito kiba don jingduna ha ki dkhot met da kaba bynrap ba kane ka sorkar ka la shim katto katne ki sienjam kum ka jingpynlong ia ki jingialang ban sam ia ki tiar ai jingiarap, ki Universal ID Card ia kito kiba don jingduna dkhot met kiba iaid kam ha kylleng ka ri. U la kren ruh shaphang ka campaign Accessible India, kaba dang iaidshakhmat ha kane ka ri ban plie lad ia baroh ki briew kiba don jingduna ha ki dkhot met.
La ai ruh ia ka jingiarap pisa bad ki scholarship sha ki samla bad ki khynnah pule kiba don jingdunaha ki dkhot met khnang ba kin lah ban ioh ia ka pule puthi khlem kanokano ka jingma, u la ong. U Myntri u la kular ba ka sorkar jylla kan bteng ban kyrshan ia ka CRC Shillong khnang ba kan lah ban treikam kumba la mang.
Ka Kong M AmpareenLyngdoh, MLA, Shillong East ka la ong ba ka hun ban iohsngew shaphang ki kam ki ban sdang ha kane ka CRC ban pynthikna ba ki briew kiba don jingdunaha ki dkhot met ki don ia ki lad kiba biang ha kane ka jylla.
Ka Kong Lyngdoh ka la iaroh ia ka Sorkar kaba la seng ia kane ka CRC da kaba bynrap ba ka kam shakhmat ka dang bun na ka bynta ka bha ka miat jong kito kiba don jingdunaha ki dkhot met bad ka la ong, ka wan hangne da ka mynsiem kaba kylluid.
Ka long, “nga wan ban ai ka kti ka diang ka mon, nga wan ban iashim bynta ha kane ka prokram kaban pynbiang ia ki jingdonkam jong ki briew kiba don jingdunaha ki dkhot met. Nga kmen ban iohi ba ka don ka bynta kaba heh ha ki kam pule puthi bad ka jingkyntiew ia ki sap na ka bynta kine ki hynmen ki para jong ngi Man ka konstituensi ha Meghalaya ka dei ban pynthikna ba ki iadon bynta bad kane ka kam kaba bha ban pynkupbor ia ki briew bapher bapher ha ka imlang sahlang kiba don ia kine ki jingduna ha ka met.”
Ka Anjali Bhawra, Secretary, DEPwD, MSJ&E, GoIka la ong ba ka ngeit skhem ba kane ka CRC kan kyntiew ia ki sap jong ki briew ka Meghalaya bad katba dang iaid ka por, kan lah ban ai ia ki jingshakri na ka bynta baroh ki 21 jait ki jingdunaha ki dkhot met.
Kane kan pynthikna ba ki briew na kane ka thain kin lah ban wan sha ka CRC bad ioh ia ki jingshakri kiba biang, ka la bynrap. Ka la kyntu ia ka National Institute for Empowerment of Persons with Multiple Disabilities (NIEPMD), Chennai ba kan ai jingiarap ia baroh ki briew kiba shem jingeh hapoh ka CRC lyngba ka video conferencing lane lyngba ka jingwan jong ki briew.
Ka la kyntu ruh ia ka tnat ba kan ai jinghikai shuh shuh ia ki NGO kiba trei ha kine ki kam khnang ba kin ioh ia ki grant sorkar na ka bynta ki prokram jong ki bad khnang ba kin lah ban pyniar ia ki kam jong ki sha ki jaka nongkyndong jong ka jylla.
U Sampath Kumar, Principal Secretary, ka tnat Social Welfare jong ka sorkar Meghalaya, u la ong ba u sngewnguh ia ka tnat Social Justice and Empowerment, GoIkaba la seng ia kane ka CRC bad ia ka jingtyrwa ban shna ia ka jaka ba paka ha Umsawli.
U la ong ba kane ka CRC kan long ka jaka kaba donkam bha na ka bynta ka jylla; bad u la ong, “Shisien ba la don kum kine, ka wan ka roi ka par, ka don ka rukom ai jingkyrshan ia ki briew. Baroh kine ki National Centre bad ki Regional Centre ki don ka bynta kaba khraw.
Haba phi peit ia ka histori ha kylleng ka pyrthei, haba don kine ki Institution of Excellence, ka roi ka par ka wan ki long kiba donbok ba ka Shillong ka la sdang kylla sha ka Regional Centre na ka bynta ki sienjam kiba bun bad kine ki iarap bha ia ka roi ka par jong ka jylla bad ka thain shateilammihngi.
Ka la don ruh ka jingsam ia ki tiar ai jingiarap, ki tiar ai jinghikai sha ki samla bad ki khynnah pule kiba don jingdunaha ki dkhot met bad la sam ruh ia ki khusnam sha ki nongjop jong ka Mini Sports ba la pynlong da ka NIEPMD, Chennai ha ka jingiatreilang bad ka Bethany Society, Shillong.
