Shillong, K.Lyngkot 13: U Archbishop ka jylla niambah jong ka Balang Katholik Shillong, u Archbishop Victor Lyngdoh, mynta ka sngi la plie pyrda ia ka jingrakhe jong ka jingdap 100 snem jong ka jingwan iuhkjat ka seng ‘riew niam Salesian of Don Bosco ha lum Khasi.
Ia kane ka jingplie ia kane ka jingrakhe la pynher ia ka lama jong kane ka seng ‘riewniam ha Don Bosco Technical School, Laitumkhrah, Shillong. Ia kane ka jingrakhe ba la plie pyrda mynta ka sngi yn pynkut pat ha u bnai Risaw 2022.
Ha kane ka sngi basdang jong kane ka jingrakhe, ba la pynlong ha Don Bosco Technical Technical School, la kynmaw ia kata ka sngi sah jingkynmaw ba ha ka 12 tarik u Kyllalyngkot, 1922 ka seng ‘riewniam Salesian of Don Bosco, ka la wan kum ka kynhun Missionary jong ka thain Shatei Lam Mihngi.
Ha Guwahati bad ha ka sngi kaba bud, kata ka 13 tartik u Kyllalyngkot 1922 ka la ioh ban wan iuhkjat pat ha Shillong. Ia kane ka kynhun, la ialam da u Father Louis Mathias, uba la kylla long u Bishop banyngkong jong ka Shillong ha ka snem 1934.
Kane ka jingrakhe dap 100 jong ka jingiasyllok Salesian ha Ri Khasi Jaintia, ka la sdang da ka jingpynher lama hakhmat jong u Mot Don Bosco, ka jingrwai jong ka seng bad ka jingpyndon burom ia ka Maria, kaba long ruh ka nongri nongsumar jong ka seng bad pynbud pat da ka jingiaiaid lang na katei ka jaka sha Iingmane-bah Nongiarap Ki Khristan.
Ha kane ka jingiaiaid lang, la lam khmat da ka jingrah ia ka diengphna bad ka Bible ban pynsawa sha ki saw lyer jong ka pyrthei ia ka jingwan jong ka Gospel bad ka jingiasyllok Salesian ha Ri Khasi Jaintia.
Hadien kane la ioh ia ka knia ka khriam Mass Bakhuid ba la pynbynta da u Archbishop Victor Lyngdoh ryngkat bad ka jingdon jong u Fr Paul O Lyngkot u Provincial, u Fr John Zosiama, u Vice Provincial, U Fr Richard Majaw u VG ka Shillong Archdiocese, U Fr Pascal Lyngodh u Parish Priest ka Iingmanebah, ki Lyngdoh bad riewniam Salesian ha Iingmane-bah.
Ha kaba sam ia ka ktien jong u Blei, u Archbishop Lyngdoh u la pynpaw ia ka jingsngewnguh ia u Blei da ka jingwan jong ka kynhun Salesian ha Shillong. U Archbishop Lyngdoh u la ong ba ka long ka jingkyrkhu kaba khraw ia ka Balang, kaba iai trei ban ialap bad ban pynsakhriang iaka khubor Babha bad ban san iathoh ka pule bad ia ka jingnang jingstad.
Shuwa ia kane, u dkhot jong ka seng Salesian, u Father A.L. Jose, uba long u uba Co-ordinator jong ka Centenary Celebration, u la ai ia ka history lyngkot jong ka seng.
U la iathuh ba dei kita ki 11 ngut ki Missionary jong ka seng Salesian na Italy, France, Spain bad San Marino hapoh ka jingialam jong u Father Louis Mathias ki la ioh ban iuhkjat ha Shillong ha ka 13 taraik u Kyllang Lyngkot, 1922.
