Shillong, Jymmang 08: Ia ka ophis ba shipor jong u SDO, jong ka Mawshynrut Civil-Sub-Division la plie mynta 
ka sngi ha Riangdo da u Bah Gigur Myrthong Chairman jong ka Meghalaya State Housing Board u ba dei ruh u MLA jong kane ka jaka.
Haba kren ha ka jingialang kum u kongsan u Bah Myrthong, u la ban jur ia kawei ka phang bad kata ka long ba don kam ban kyntiew ia kane ka thain namar ka dang long kaba sah dien haba ia nujor bad kiwei ki bynta jong ka jylla.
Kum u MLA jong kane ka jaka u la kyntu ia ki Sordar, ki rangbah snong ba kin ia treilang bad ki bor ba dei peit ban pynthikna ba kane ka dong bad ka thain kan kiew ha baroh ki liang ha ki kam pynroi. Kum u MLA jong kane ka jaka un ialeh katba lah ban ia kren bad ka sorkar na ka bynta ki kam pynroi baroh katkum ka kyrdan jong ka Civil Sub Division.
Ha ka jingkren jong u Bah K L Nongbri u ba dei SDO jong kane ka Civil Sub Division, u la pynpaw ia ka jingsngew nguh ia ka sorkar kaba la ai ia ka jingmynjur ban sdang ia kane ka ophis bad u la ai ka burom ruh ia u Deputy Commissioner u ba la trei shitom ban pynurlong ia kane ka kam.
Ha kane ka jingialang la pyntip paidbah ruh ba ia ki aplikoshon kaba long online na ka bynta ban ioh ia ka Scheduled Tribe Certificate yn sa sdang na kane ka ophis ha u bnai Jylliew. Ha kane ka sngi u MDC jong kane ka jaka u Bah M Mawsor ruh u la ia don lang ha ka jingiadon lang ki riew rangbah ka thain.
