Shillong, Naiwieng 11: U Bah Vincent H Pala, MP jong ka Shillong ha ka sngi saitjian u la plie ia ka Christ King Higher Secondary School ka ba don ha Riangdo, jong ka West Khasi Hills District.
Ha ka jingkren jong u Bah pala kum u kongsan ha kane ka sngi, u la pynpaw ka jingkmen ban plie bad kyntiew ia kane ka Christ King Secondary School sha ka Christ King Higher Secondary School, ha kaba u la ong ba ka thain Riangdo ka dei ka pdeng jong ka jylla Meghalaya bad u kwah ban iohi ba ka roi ka par kan dang kiew ha kine ki snem ban dang wan.
U la kyntu ruh ia ki khynnah skul ba ka jingduk kam dei ban long ki jingkhang lad ia ka jingpule namar bun na ki riewkhraw jong ka Ri ki dei ki ba wan na ka long ing kiba duktam kum u President barim jong ka Ri u Dr. A. P. J Abdul Kalam bad teng teng ka jingduk ka long ka spahbah ba kin poi sha ki kyrdan ba don burom ha ka jingim.
Ha kaba ia dei bad ka jingiaid lynti jong kane ka skul la kren da u Bah Arkuis Rynniaw u ba dei u wei na ki dkhot jong ka Managing Committee, ha kaba u la batai ba ia kane ka skul la sdang ha u snem 1972. Kane ka skulk ala mad ia shibun ki jingeh hyrnei da ka jingtrei shitom ki phadar la lah ban poi sha kane ka kyrdan kaba mynta.
Ha kane ka jingplie ia kane ka Christ King Higher Secondary School u Secretary jong ka skul u Phadar Sebastian, u la iathuh ba kane ka skul kala pynmih ia ki Professor, Doctor, Officers, ki nongkhaii, ki MLA bad MDC. Ha kane ka sngi la ioh jingkren ruh na I Bah Methodius Dkhar ba long ruh kum u symbud Kongsan ba dei u khynnah skul barim jong kane ka skul.
U Bah Dkhar u la pynkynmaw ba dei lyngba kane ka skul u la lah ban kiew bha ha ki kam ki jam wat lada ha ki sngi kiba nyngkong la hap ban mad ia ki jingeh, ula kyntu ruh ia ki khynnah jong kane ka skul ba ki dei ban long kiba trei minot bha namar ki kmie ki kpa jong ngi ki trei shitom ban phah skul bad ban pynnang pynstad.
