Shillong, Nailar 3: U myntri rangbah jong ka jylla u Dr Mukul Sangma mynta ka sngi u la plie ia ka tnad pule kaba thymmai hapoh jong ka Lady Keane Collage ia kaba la tip kum ka ‘Tourism and Travel Management’. Ha ka jingkren jong u myntri rangbah u la ong ba kane ka tnad pule thymmai kan wanrah ia ka jingkylla ha ki por ban sa wan.
U la ong ruh ba kane kan wanrah ia ka jingkyrmen ia ki samla bad ha ka juh ka por kan pynlong ba ki samla kin noh syniang sha ka roi ka par jong ka jylla. U la ong ba ka kam jngohkai pyrthei ka long kawei na ki lad ban ai kam ai jam ia ki ba bun ki liang.
U myntri rangbah u la ong ruh ba ka pule puthi bad ka kam jngohkai pyrthei ka dei kawei na ki lad kiba biang bad kaba don kam ka long ban hikai ia ki samla pule, u myntri rangbah u la ong ba kane ka jingpule kaba pule mynta ym shym la saindur katkum ka jingangnud jong ki samla dei na kata ka daw la hap ban kylliang ia ka rukom pule.
U myntri rangbah u la ong ruh ba ki jingpule ha ki college ka dei ban pynlong ia ki samla pule ba kin long ki nongaikam ym ki nongwad kam, ka jylla ka don shibun ki jingdon jingem ia kaba lah ban pynkylla ia ki sha ki mar kiba lah ban die ha ki iew ki hat jong ka pyrthei. Kane ka jingkhleh lang ka jingnang jingstad, ka koit ka khiah bad ka kam shangkai pyrthei kan wan rah ia ka jingkylla ha ka jylla.
Ka Principal, Dr C Massar, kala ong ba ia ka jingpule tang ha ka kyrdan diploma la sdang ha u snem 2008 hynrei ia ka kyrdan pule ha ka Degree dang sdang mynta u snem. U Bah M O Rynjah u la batai shaphang kane ka rukom pule bad la ong ba ia kane ka jingpule la ioh ia ka jingbit na ka skul bah NEHU.
