Shillong, March 11: U Dr Mukul Sangma myntri rangbah ka jylla mynta ka sngi u la plie ia ka Nartiang Police Station ha
West Jaintia Hills kaba hap hapoh jong ka Thadlaskein C & RD Block ha kaba u myntri kam poh iing ka jylla u Bah HDR Lyngdoh bad u MLA jong kane ka jaka u ba dei ruh u myntri ha kane ka sorkar u bah Sngewbhalang Dhar u la ia don lang.
Haba kren ha kane ka jingplie ia kane ka police station kaba thymmai u myntri rangbah u la ong ba kane ka jingbuh ia kane ka police station ka long ban wan rah ia ka jingsngewshngian jong ki briew bad haka juh ka por ruh ki briew kin sngewthuh ba ka ain ka don bad kane kan wanrah ia ka jingshong suk shong sain ha ki shnong ki thaw.
Kumba ka long ka shnong Nartiang ka dei ka shnong kaba don la ka jong ka parom bad kane ka jaka kan kiew lada pynshlur ia ki kam jngohkai pyrthei namar kane ka jaka ka don ia ki jingpynsah nam pynsah burom ia ki mati jong ki long shuwa man shuwa. U la ong ba kane ka thain kala kylla shrah na ka daw jong ka jingtih marpoh khyndew hynrei da kaba pynshlur ia ka rep ka riang kan wan rah biang ia ka jingkylla ha ka khyndew.
U myntri rangbah u khot u wer ia ki paidbah ba kin mih sha khmat ban ia khun pyrshah ia ki kam sniew pyrshah ia ki kynthei khynnah bad kane jingjia baroh ka lah ban dei namar kala jyllei palat ki kam dih drugs ia kaba ka sorkar kan sa leh da kaba tyngeh ban the la kam ia kane ka jingsniew.
Ia kane ka jaka ba don ki pulit ha ka snem 1972 la buh ia ba kan long tang kum ka “Nartiang Police Investigation Centre” bad kala sdang ban trei kam na ka ophis jong ka PWD bad dei ha u snem 1995 la rah ia ka jingtrei kam jong ki sha kane ka jaka ba don mynta.
Ha kine ki 44 snem kiba la leit kane ka jaka kala ai ka jingshakri sha ki 60 tylli ki shnong kiba don ha kane ka thain, ban the lakam ia ki kam sniew, ban ia khun pyrshah ia ki kam lehnoh bad ban peit ia ka shong suk shong sain ha kane ka thain.
Kiba la ia don lang ha kane ka sngi ki long u u Bah Kennedy Khyriem, Parliamentary Secretary, Bah Robinus Syngkon, MLA, Mowkaiaw, Bah Hopeful Bamon, MLA, Sutnga-Saipung, Commissioner & Secretary, Home (Police), E P Kharbih, u DIG, Meghalaya, Dr S B Singh, Chief Executive Member, Jaintia Autonomous District Council, Thombor Shiwat, Wahehshnong, Nartiang bad u Superintendent ki Police, ka West Jaintia Hills,u R Muthu.
