Shillong, Lber 10: Ia ka PDB Projek lah seng bad
sdang naduh u snem 2015. Ia kane ka projek lah sdang ha kiwei ki bynta jong ka jylla India ha ki snem ba la leit. Hynrei, na ka bynta ka thain shatei lammihngi la sdang ia kane ka projek ha ka 10 tarik u bnai Lber 2018 ha ka jingialang plie ka ba la long ha Anton Hall, Laitumkhrah, Shillong.
Ia kane ka program la pynlong da ka Indian Medical Association (IMA), ka All Indian Ophthalmological Society (AIOS) ryngkat ka jingiatreilang bad ka Bansara Eye Care Centre (BECC) bad ka Society for Promotion of Eye Care & Sight (SPECS).
Mynstep ha ka por 10 baje, ban pyniar ia ka jingtip shaphang ka jingpang shini bad ka jingmatlah lyngba ka jingpang shini, la pynlong ia ka Rally thukthuk ia kaba la pyniaid ha ka sor Shillong bad ia kane ka Rally lah plie da u Superintendent of Police jong ka East Khasi Hills District, u Bah Davis N R Marak. Haba kren ha kane ka jingialang shuwa ban plie u la ai khublei ia ki nongpyniaid bad ruh u la kular ban kyrshan ia kane ka projek.
Ha ka juh ka por, ban pynsah kynmaw ia ka jingplie ia ka ne ka projek la pynlong ia ka jingialang ban pyntip ia ki ba ia don lang kumno ban iada ialade na ka jingpang shini kaba long ruh kawei na ki daw ba lah ban pynmatlah ia ki briew. Ki nongkren kiba kongsan ha kane ka jingialang plie ki long Dr. D.S. Sethi (Diabetologist), Dr. N S D Raju (Chairman IMA PDB Project) bad Dr. BNR Subudhi (National Coordinator IMA PDB Project). Kumba 314 ngut ki nong ia shim bynta ki la wan na ki NGO bapher bapher, ki member jong ka press, Nursing Skul, ki Seng jong ka koit ka khiah, ki Kolej bad ki skul bah.
Hadien ka jingpoi jong u Lat ka jylla u Ganga Prasad u ba la long u kongsan ha ka jingplie ia kane ka projek. Haba kren ha kane ka jingplie ia kane ka projek u Lat u la ban jur ia ka jingdonkam ban pynmlien ialade ban im ka jingim kaba beit ha kaba iadei bad ka koit ka khiah ban iada na kane ka jingpang shini kaba long ruh kawei na ki daw kiba lah ban pynmatlah ia u briew. U la ban jur ruh khamtam ia ki khynnah samla ban pynmlien ka jingkilan met kaba long kawei na ki lad ban iada na kane ka jait jingpang ryngkat bad ka jingkular ba un ai ka kti kamon kti kadiang na ka bynta kane ka Projek.
Ia kane ka jingialang la pyniaid da I Dr. W. Kharshiing (President IMA Meghalaya). Kiwei de ki riewpaw khmat kiba la ia don bynta lang ki long Dr. J. V Basaiawmoit (Organizing Secretary bad Medical Director, BECC), Dr. Lobsang Tsetim (Senior Eye Surgeon, Arunachal Pradesh) bad Dr. AK Das (Ophthalmologist)
Hadien ka jingplie ia kane ka projek la ioh ruh ban pynlong ia ka jingsumar khmat ei na ka bynta kiba pang shini haduh 4 baje janmiet ha kaba bun ki paidbah ki lah ioh ei ia ka jingmyntoi na kane ka jingsumar.
