Shillong, Jymmang 13: U Bah Process T Sawkmie MLA jong ka Mawlai u la plie paidbah ia ka “Solicom Valley Park Resort” kaba don ha Mawlai Mawongrim ha ka sngi Saitjian ha ka jingiadon lang ki riew paidbah ban ia sakhi lang ba kan long kawei na ki jaka jngohkai pyrthei.
Ha ka jingkren jong u Bah Sawkmie, u la ong ba kane ka long ka nuksa kaba bha ba ki paidbah kin sdang ia kume ki jaka jngohkai pyrthei bad ym tang kata kane ka long ruh kawei na ki lad ai kam ai jam ia ki samla ha kane ka juk kaba mynta ba don ka jingkyrduh kam.
U Bah Sawkmie u la ong “Nga sngewkmen bha ba nga ioh ban ia don bynta lang ha kane ka sngi, haba plie ia kane ka jaka kaba la buh ia Mawiongrim ha ka map jong ka India na ka bynta ki paidbah ka ri, khamtam ia ki nongjngohkai pyrthei da kaba pynmih ia website.”
U Bah Sawkmie u la ai mynsiem ia kane ka long iing kaba la plie ia kane ka park resort, khamtam ia uwei na ki khun samla ka long iing uba khmih ia kane ka park, u bah Vincent Laloo bad kiwei ki samla ba ia trei ryngkat bad u, ba kin long kiba trei shitom.
U la pynpaw ba kane ka jingplie ka dang dei tang ka jingsdang, kumta ki hap long kiba iai shah, namar mar ia plie kan ym iaid, hynrei kat nangmih ki sngi kan sa paw bad u kyrmen ba shen kan sa paw bha.
U Bah sawkmie u la ong wat pyrkhat ka iohnong noh mynta, kaba kongsan shakri bha, ka jingiohnong kan sa wan hadien, na ka liang jong u MLA u la ong ba un sa shim khia ha kaba ia dei bad ka surok khnang ba ki nongwankai kin suk ha ka leit ka wan.
Ha ka jingkren jong u Bah Vincent Laloo, uba long kum uwei na ki nongkhmih ia ka kam, u la pynpaw ba ia ka Solicom Valley Park Resort la shna ha ka jaka kaba 4 acre, kane ka dei jong ka kur Laloo. Ia kane ka jaka jngohkai la don ruh la ka jong ka website ha kaba ki briew ki lah ban peit ia kane ka jaka.
