Shillong, Jymmang 15: U Myntri Sorkar Pdeng ba dei khmih ia ki tnat dawai kynbat jong ka sorkar pdeng u Sarbananda Sonowal u la plié paidbah ia hynriew tylli ki jingtei ba thymmai kum shi bynta ba ar II jong ka North Eastern Institute of Ayurveda bad Homoeopathy (NEIAH) mynta ka sngi ban pynkhlain ia ka jinglah treikam. Ka jinglut jingsep ban tei ia kine ki hynriew tylli ki jingtei ka long kaba la antad ban tam ia ka T 60 klur.
Ha ka jingai jingkren jong u, u Myntri Sorkar Pdeng ba dei khmih ia ki tnat Ports, Shipping bad Waterways bad Ayush, u SarbanandaSonowal u la ong, “Nga dap da ka jingkmen ba ngi la lah ban plié paidbah ia kine ki hynriew tylli ki jingtei ha Shillong mynta ka sngi.
Kin kyntiew ia ka jinglah treikam jong kane ka jaka ai jinghikai kaba lah ban don ka bynta kaba khraw ha ka jingkyntiew ia ki rukom sumar tynrai ha kane ka thain. Hapoh ka jingialam lynti u Myntri Rangbah Duh, u Narendra Modi, ngi dang shim ia ki sienjam ban wanrah ia ka jingwad bniah ha ki rukom ai jingsumar tynrai ha ryngkat ki rukom sumar katkum ka juk mynta.
Ki iohi ia ka bynta kaba khraw ha ka jingiatreilang ki lad ai jingsumar ha kane ka ri ha ki snem ba dang wan. Ka jingbei tyngka jong ka Sorkar lyngba kine ki jingtei kiba thymmai kin pynkhlain ia ki sienjam ban pynkhyllie im biang ia ki rukom ai jingsumar tynrai ha kane ka thain jong ka ri. U myntri u dap da ka jingkmen ban iathuh ia phi ba shen ka NEIAH kan sdang ban pyntreikam ia ki kali kit nongpang.
Kine ki hynriew tylli ki jingtei ba thymmai ki kynthup ia ka hostel na ka bynta ki shynrang ha kaba lah ban sah 104 ngut, ka hostel na ka bynta ki kynthei ha kaba lah ban sah 104 ngut, phra tylli ki Type III quarter, 6 tylli ki Type IVA Quarter, 7 tylli ki Type IVB ba long ruh ka jaka sah u Director, ka hostel na ka bynta ki senior resident ha kaba don 25 tylli ki jaka sah, ka guest house kaba 19 kamra bad 2 tylli ki karma kiba kham bha. Ia kine ki jingtei la shna ha ka jinglut jingsep kaba kumba T 60.16 klur.
Ha ka jingkren shaphang ka bynta jong ka thain shateilammihngi ha ki lad ai jingsumar tynrai, u SarbanandaSonowal u la ong, “Ka thain shateilammihngi jong ngi ka dei kaba la ioh jingkyrkhuna ka meimariang bad ki jingai jong ka ki la ai ia ki lad ia ngi ba ngin ai jingsumar naduh ki por mynshuwa.
Ki kwah ban rah shakhmatia kane khnang ba kiwei kiwei ruh ki ioh jingiarap na kane bad ki ioh ia ka jingim kaba kham bha. Ka jingthmu jong u Myntri Rangbah Duh ka dei ban kyntiew ia ka jingiar jong ki lad ai jingsumar kiba treikam bad kiba iaidryntih.
Da kaba peit sani ia ka jingpyniar ia ka jinglah wad bniah bad da kaba tei ia ka nongrim science ha ki lad ai jingsumar tynrai, ngangeit ba kine ki hynriew tylli ki jingtei ba thymmai ba la plié paidbah mynta ka sngi kin iarap bha ia ka NEAIH ba kan kot ia kane ka thong.
Ki nongioh jingsumar ha ka NEIAH ki dang kham bun katba dang iaid ka por namar ki briew ki ioh mad ia ka koit ka khiah ha kane ka hospital. Ha u snem mang tyngka 2022-23, ki la don 52,088 ngut ki briew kiba ioh jingsumar na ki OPD clinic katba 504 ngut ki nongpang ki dei kiba la sah ha kane ka hospital ban ioh ia ka jingsumar.
Ha kaba iadei bad ka Ayurveda, ki la don 36,683 ngut ki nongpang kiba la leit sha ki OPD clinic jong ka NEIAH bad 482 ngut ki nongpang ki dei kiba la thiah ha ka bynta IPD jong kane ka jaka ai jingsumar.
Ha kaba iadei bad ka Homoeopathy, ki la don 19,397 ngut ki nongpang kiba la ioh jingsumar ha ki OPD clinic katba 22 ngut ki nongpang ki dei kiba la sah ha kane ka jaka ai jingsumar. La pynlong haduh 35 tylli ki health camp bad 4 tylli ki CME (Continuing Medical Education) da ka NEIAH ha kane ka juh ka samoi.
Ha kane ka sngi, la wan iashim bynta lang ruh ki Symbud Kongsan, kiba long ka Dr Mazel AmpareenLyngdoh, Myntri ka tnat ka koit ka khiah, Sorkar Meghalaya bad u Bah AL Hek, Myntri ka tnat Animal Husbandry and Veterinary, Sorkar Meghalaya.
Prof. Prabha Shankar Shukla, Vice Chancellor, North Eastern Hill University (NEHU); Prof (Dr) Nalin Mehta, Director, North Eastern Indira Gandhi Regional Institute of Health & Medical Sciences (NEIGRIHMS) bad Dr Neeta Mahesekar, Director, NEIAH.
Ha ki kam ai jinghikai, ki la don mynta haduh 6 tylli ki kynhun shah hikai ha ka Bachelor of Ayurvedic Medicine & Surgery (BAMS) bad Bachelor of Homeopathic Medicine & Surgery (BHMS) ha NEIAH.
Na ki 50 ngut ki shah hikai ha u snem 2016-17, ka bor ban ai jinghikai ka la kiew sha ka 63 ngut ki shah hikai ha man ka kynhun shah hikai. Ki jingai jinghikai ki iasnoh bad ka North Eastern Hill University (NEHU), Shillong, Meghalaya.
Ka North Eastern Institute of Ayurveda & Homoeopathy (NEIAH) ka dei ka jaka ai jinghikai kaba peit hi dalade hapoh ka Tnat Ayush jong ka Sorkar India. La seng ia ka NEIAH ban ai ia ki lad ai jingsumar ia ki briew ka thain shateilammihngi bad ka jylla Sikkim hapoh ki rukom sumar Ayurveda bad Homoeopathy.
Kane ka jaka pule mynta ka pyniaid ia kane ka kolej na ka bynta ka Ayurveda bad kawei ka kolej na ka bynta ka Homoeopathy ha ryngkat bad ki hospital ba iadei bad kine. Kane ka jaka ai jingsumar ka don ka hospital Ayurvedic kaba don 60 tylli ki jingthiah nongpang bad ka Homoeopathic hospital kaba don 20 tylli ki jingthiah nongpang.
Ki hospital ha ka jaka jong ka NEIAH ki dei kiba la don ki private ward, bad ka karma pynkhakhyllung, ka Operation Theatre, Yoga centre, Physiotherapy unit, Panchkarma unit bad kiwei kiwei. Ki lad wad bniah kum ka ECG, USG, X-ray, ki laboratory, Nadi Tarangani bad kiwei kiwei ki dei kiba la biang lut ha kane ka jaka.
Ka jaka pule ka don 7 tylli ki OPD ha ka Ayurveda bad 5 tylli ki OPD ha ka Homoeopathy. Ka don ka IPD kaba pura ha kaba don 60 tylli ki jingthiah nongpang ha ka Ayurveda bad 20 tylli ki jingthiah nongpang ha ka Homoeopathy. Ka NEIAH ka don ha ka jaka kaba heh haduh 20 acre.
