Mawkyrwat, Nailar 10: U myntri rangbah ka jylla u Dr Mukul Sangma mynta ka sngi u la plie ia ka Ranikor Administrative Unit, ha Ranikor kaba hap hapoh jong ka South West KHasi Hills District. Ha ka jingkren jongu Dr Mukul ha kane ka sngi u la ban jur ba ka sorkar ka kwah ban leh ei ei na ka bynta ki surok, khamtam eh hapoh jong ka South West KHasi Hills District ban kyntiew ia ka ioh ka kot jong ki paidbah.
U Dr Mukul u la ong ba “ Ngi wan hangne mynta ka sngi ka long ban buh ia u symbai jong ka ioh ka kot na ka bynta la shai la shisngi, u myntri rangbah u la kubur ba kane ka thain ka dei kaba dang shah dien ha kiba bun ki liang, u la ai khublei ia ki nongialam jong ka SWKH District kiba la ai ka jingiatreilang bad ka sorkar ban pynioh ia ka District”.
Na ka liang jong u myntri rangbah u la ong ruh ba ka sorkar ka thaw ia ki lad ki lynti kumno ban pynioh ia ki lad kamai ka jih, ka sorkar kala thaw ia ka Meghalaya Piggery bad Livestock Development Mission lyngba ka tnad C&RD ban kyntiew ia ka kam ri jingri ban long ka jingmyntoi ia ki paidbah. U la kyntu ia ki paidbah ba kin tur sha khmat ban ioh ia ki jingmyntoi, mynta ka sorkar kala mang pisa haduh T.1600 klur ka tnad pynroi nongkyndong.
Haba ia dei bad ki surok u myntri rangbah u la ong ba ka surok ka dei na Shillong – Nongstoin-Rongjeng – Tura Road kaba don ia ka lynter kaba 272 kilometer bad kaba dei kaba heh tam ha ka jinglut kaba la jan kot sha ka 3000 klur nadong shadong. Baroh ki District Capital yn pyniasnoh bad ki Surok bah ba marjan da ki 2-Lane bad ka Mawkyrwat kan ioh ia ka surok na ka Bye Pass na Lad Mawreng shaduh Ranikor ha ka jingjrong kaba 109 kilometer bad ia kane la dep ioh ia ka jingmynjur.
Kane ka lah ban long namar ha ka 1st Phase ngi la lah ban kynthup ia ka surok na Ranikor sha Baghmara-Maheshkhola kaba jrong 139 kilometer”,la ong shuh shuh u Dr Mukul Sangma uba la iathuh ba ka Baghmara ka la dep ban pyniasnoh bad ka NH 62 bad haba khein ia ka jingjrong ka surok na Ranikor sha Baghmara bad kiwei kiwei ki jaka kan poi ym duna ia ka 400 kilometer bad ka surok Bah 127 B ka bam wan na North Bengal kan ïaid lyngba ka Phulbari-Selsela-Rongrang shaduh Nongstoin ha ka surok NH 44.
Ha kane ka sngi la don lang u myntri kam poh iing ka jylla u Bah HDR Lyngdoh, u Myntri ka tnad shna surok u Martin M Danggo, u MDC u Bah Manstudy Nongrem, Bah Hedrian Lyngdoh MDC, u Bah S Kharlyngdoh Commissioner bad Secretary ka tand kam poh iing ka sorkar jylla ka kong Ripnar Lyngdoh Deputy Commissioner jong ka South West Khasi Hills District, u BDO jong ka Ranikor Block u Bah Ferdinand Basan u ban long ruh u nongpeit ia ka Administrative Unit ba thymmai.
Ha kane ka sngi la pule ia ka dorkhas ban dawa ia ka Civil Sub-Division ba thymmai ha Ranikor da u Bah Mansturdy Nongrem uba dei ruh u Chairman ka Civil Sub-Division Demand Committe bad aiti ruh ha u Kongsan uba la kren shai halor ka jingdawa ia ka Civil Sub-Division ka sorkar kan sa peit ha ka por kaba biang tam. Kumjuh ruh la pynshongshit shuh shuh ia kane ka jingialang da ki jingrwai bad jingshad tynrai da ki samla Khasi bad Garo kiba sah ha kane ka thain. U heprit Aibanbhabok Thongni u ba la shah jied sha ka thup ban iakop rwai jong ka lympung Meghalaya Icon uba la rwai shaphang ka jingdonkam jong ka jinglehkhuid. Na ka liang u MLA u Bah Martin M Dango kum u nongmihkhmat u la pynpaw ia ka jingsngewkmen ba ka sorkar ka la ibit ia ka thain Ranikor ban ioh ia ka Administrative Unit tang hadien san snem mynshwa ba la ioh ia ka Mawkyrwat Civil Sub-Division bad u pynpaw ka jingkhmih lynti ba shen ka Sorkar kan pyrkhat ban pynioh Civil Sub-Division ha kane ka thain.
