Plie u President ka India ia ka “Narendra Modi Cricket Stadium” ha Ahmedabad

New Delhi, Feb 24: Ka long ka jingsngew sarong ia ngi baroh ba ka Narendra Modi Cricket Stadium ka la long ka madan ialehkai cricket kaba heh tam ha pyrthei ha kaba lah ban shong 1.32 lak ngut ki nongpeit kai, la ong u President ka India, u Ram Nath Kovind haba u la plie ia ka Narendra Modi Cricket Stadium bad u la buh maw nongrim ia ka Sardar Vallabhbhai Patel Sports Enclave ha Ahmedabad mynta ka sngi.

U la ong ba kane ka madan ialehkai cricket ka long kaba heh tam ha pyrthei bad ka ai ruh ia ki jingshakri kiba katkum ka juk mynta ha ki kam ialehkai. U la iaroh ia ki ophisar, ki agency bad ki dkhot ka Gujarat Cricket Association, kiba la trei shitom ban saindur ia ka Narendra Modi Stadium.

Da kaba iaroh ia kane ka madan ialehkai, u President u la ong ba lyngba ka Gold rating bad ka jingithuh kum ka green-building, kane ka madan ialehkai ka long ka dak jong ka roi ka par ka bym pynjot ia ka mariang. Kane ka madan ialehkai ka pyni ia ki jingangnud bad ki jinglah treikam jong ka India kaba thymmai kaba la paw mynta ha kylleng ka pyrthei.

U President u la ong ba ka jingkhlain jong ka India ha ka jingialehkai cricket ka pyni shai ia ka jinglah jong ka ri ban leh bha ym tang ha ki jingialehkai hynrei ba ka lah ban leh kumjuh ha ka roi ka par bad ka lah ban don ha ka kyrdan ba kham shalor hapdeng ki ri kane ka pyrthei.

U President u la ong ba ia ka India la tip kum ka ‘Powerhouse jong ka cricket’ lane ka ‘jaka jong ka cricket’. Kumta ka iadei bha ba ka madan ialehkai cricket kaba heh tam ha kane ka pyrthei kan don ha kane ka ri.

U la iaroh ia ki sienjam ba la shim ban shna ia kane ka madan ialehkai ba la sdang ha ka por ba u Narendra Modi u long u Myntri Rangbah jong ka Gujarat bad ba la buddien da u Amit Shah kum u Chairman ka Gujarat Cricket Association.

U President u la ong ba bun ki khynnah samla na ki jaka nongkyndong ki la pawkhmat ha ki kam ialehkai namar ba ki la trei shitom. Ki samla jong ngi ki don ka sap ban leh bha ha kiwei kiwei ki jingialehkai ha kylleng ka pyrthei.

Ban pynurlong ia kane, ngi dei ban pynbiang ia ki jingdon jingem katkum ka juk mynta na ka bynta jong ki kumba ngi pynbiang ia ka cricket. Na ka bynta kane, ka Sorkar Gujarat ka la shim ia ka sienjam ban shna ia ka sports enclave kaba la biang lut ha baroh ki liang, hapoh ka Narendra Modi Stadium.

U la ong ba kane ka sports enclave kan long ka jaka ialehkai jong ki jingialehkai bapher bapher bad kan long ruh ka jaka ban pynlong ia ki jingialehkai ha ka kyrdan national bad international. U la ong ruh ba u ngeit skhem ba kane ka sports enclave kan pynkylla dur ia ka nongbah Ahmedabad khamtam ha kaba iadei bad ki jingdon jingem ha ki kam ialehkai.

U President u la ong ruh ba watla ka jingpynbiang ia ki jingdon jingem ha ki kam ialehkai ka long kaba donkam, ka long ruh kaba donkam ba ki samla ba don sap ki shim ia ki kabu ha kine ki jaka ba la pynbiang. Ka jingdon ki lad bad ka jingioh ban pyndonkam ia kine ki lad ka long kaba donkam na ka bynta ka jingkiew shaphrang jong ki samla ba don sap ha ki kam ialehkai.

Bun ki samla ba don sap kiba sah ha ki jaka nongkyndong kim don lad ban pyni ia la ki sap namar ka jingduk ne kiwei kiwei ki jingeh. Dang iai pyrshang mynta ban plie lad ia kum kine ki samla. Ka jingtrei kham bha ha kane ka bynta kan plie ia ki lad ban lap ia ki samla ba don sap ha kane ka ri bad kan iarap ruh ha ka jingkiew shaphrang jong kine ki samla.

Ki kam ialehkai ki wanrah ruh ia ka jingiatrei lang, ka jingiakop bad ka jingpyniadei jong ki thong jong ka ri bad ki thong shimet. Kane kalong kaba donkam ban kyntiew ia ka jinglong ba bha ha ki samla jong ka ri bad kane kan ialam sha ka jingbha jong ka imlang sahlang bad ka ri baroh kawei.

U President u la ong ba ha ka por ba u Narendra Modi u long u Myntri Rangbah jong ka Gujarat, u la ai mynsiem bha ia ki kam ialehkai ha kane ka jylla. U President u la ong ruh ba ka kolshor jong ki kam ialehkai ka dang kiew ha ka ri namar ki sienjam jong ka Sorkar Pdeng.

Ki kam kum ka ‘Khelo-India’ bad ka ‘Fit-India’ ki kyntiew ia ka jingpdiang jong ki briew ia ki rukom im kiba bha bad ki kam ialehkai. La shim ia ki sienjam ban pynpaw khmat ia ka India ha ki kam ialehkai lyngba ki prokram kum ka ‘Target Olympic Podium Scheme’. U President u la ai khublei ruh ia ki kynhun ka India bad ka England kiba la ialehkai cricket mynta ka sngi ha kane ka madan ba dang shu plie.

 

 

 

 

 

 

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet