Shillong, Risaw 29: U Syiem jong ka Hima Nongstoin, u Pa;im Phyllasing Syiem, u la plie paidbah ia ka iing dorbar jong ka kur Nongtngner hapoh ka shnong Nongjri kaba hap hapoh jong ka South West Khasi Hills District hapdeng ka jingiphuh iphing da ka jingiadon lang ka kur baroh kawei ban sakhi ia kane ka sngi sah kynmaw.
Ha ka jingkren jong u Pa’im Phyllasing Syiem u ba dei u Syiem u Kmie jong ka hima, u la kyntu ia ki khun ki hajar jong kathain ba ki dei ban niewkor ia la ki jong ki riti ki dustur bala buh da u long shuwa man shuwa khnang ba ka jinglong kur long jiad kan suk kan sain ban saindur ia la lawei jong ki pateng ban dang wan.
Na ka liang jong u Syiem ka hima, u la ai ruh ka jingkyrkhu kyrdoh ia ki kur Nongtnger ba kin nangioh ia ka suk ka sain, ha ka jur ka jaid bad ban ia tylli ruh ha baroh ki kam. U la iaroh ia kane ka mynsiem jynsur bad ka jingangnud jong ka kur Nongtnger haduh ba ki la lah ban tei ia kane ka iing dorbar jong ka kur.
Na ka liang jong u Lyngdoh ka hima Nongstoin u Bah Maxmilan Byrsad, haba kren ha kane ka sngi, u la ban jur ba kum ka kur ka dei ban don noh da ka riti synshar kur khnang ba ka long kur long jaid kan iai neh skhem bad kane ka long kaba don kam. Haba phai sha ka iing dorbar jong ka kur, la ong ba kane ka dei ka iing dorbar kur kaba nyngkong hapoh ka Hima Nongstoin.
Ia kane ka iing dorbar jong ka kur Nongtnger la la sdang ban tei ha u bnai Risaw jong u snem 2016 bad hapoh shisnem la lah ban pyndep bad la plie ia kane ka iing dorbar jong ka kur ha ka 26th Risaw 2017 da u Syiem jong ka hima Nongstoin namar ka thain Nongjri ka hap hapoh ka jong ka Hima Nongstoin. Ia kane ka iing dorbar la tei da ka jingianoh syniang jong ka kur Nongtnger bad la lah ban pyndep ia ka ha ka jinglut kaba la kot sha ka T.50 lak tyngka.
Ha ka jingkren ai khublei ban pynwai ia ka jingialang ban plie ka iing dorbar jong ka kur Nongtnger u Bah Lstin Marwein u la ong ba ka jingdon jong kane ka iing dorbar jong ka kur Nongtnger kam dei tang na ka bynta jong ka kur hynrei lah ban pyndon kam da baroh ki briew jong ka thain ha kano kano ka por ba ki don kam.
Ha kane ka sngi la don lang ruh ki riew rangbah ka thain, kum u bah M.S Nongbri, u ba dei u agent kur Nongbri, Nongkulang, u Bah Maitar Nongtnger rangbah shnong ka shnong Nongjri, Bah Dliwell Basan, Bah JJ Hashah rangbah shnong Nonghyllam, Bah Deben rangbah shnong ba rim ka Nonghyllam, Bah Sidingtar Hasshah, Bah Hemia Hasshah rangbah shong Poidbli, u Waiding Marak molor jong ka shnong Nongumbar, Kong Pelsy Snaitang, Bah C Nongbri rangbah shnong Nongkulang, Bah Evendro Nongbri rangbah shnong Parmodar
Ha kane ka sngi da ki spah ngut ki briew na katei ka thain kila ia don lang ban sakhi ia kane ka sngi sah kynmaw ha dong bad ka thain jong ka South West Khasi Hills District ba ia ka iing dorbar jong ka kur la plie paidbah da u Syiem jong ka Hima. Ia kane ka jingialang ban plie ia ka iing dorbar la pyniaid da u Bah Nassarsing N Marwein, agent kur jong ka kur Nongtnger, kane ka long katkum ka kyrwoh kaba la phah da u bah Hosting Nongtnger general secretary jong ka Kur.
