Shillong, Iaiong 15: Ka shad Suk Mynsiem ba shisien shisnem jong ka seng Khasi seng kmie Mawkhar kaba lai sngi linter kala kut mynta ka sngi ha kaba baroh ki nongshong na kylleng ka Ri Khasi kila ia poi haduh 1100 ngut kynthei bad shynrang. Ha kaba da ki hajar ngut ki paidbah kila ia poi ban sa khi ia kane ka shad ka kmen ban pynneh pynsah la ka jong ka tynrai.
Ka shad suk mynsiem ha Madan Weiking kaba la pynlong da ka seng khasi Mawkhar kaba dei ka seng kmie ha kaba baroh ki shnat na ki bynta bapher bapher jong ka Ri Khasi kila ia poi ha kane ka sngi ban pynisha ka pyrthei ba kum ka jaidbynriew khasi ka don la ka jong ka kolshor kaba la hiar pateng na u nie u kong.
Ha kane ka shad suk mynsiem ki nongshad kiba la poi, ki shynrang ki long 602 ngut bad ki kynthei ki long 498 ngut. Ka shad suk mynsiem ha madan weiking katba dang mih ki snem kala dang kiew ha ka jingpoi ki nongshad na kylleng ki shnat.
Ha kane ka sngi pynkut ia ka jingshad la sdang da ka jingiaid paidbah na iing seng na Mawkhar ha kaba la ialam da ki rangbah seng bad ynda la poi ha madan Weiking shuwa ban sdang ia ka shad kala don ka jingduwai phirat ha u nongbuh nongthaw ban pan ka jingkyrkhu kyrdoh na u ha kane ka kmen ka sngewbha.
