Shillong, Jylliew 04: Ka kynhun kaba la kam ba kila wan ban mih khmat n aka bynta ka sur jong u paidbah mynta ka sngi kila ioh ban rung hapoh phyllaw jong ka secretariat ha kaba kila ia pyrta ba ki dawa ban weng noh ia ki briew kiba sah hapoh Them Motor.
Haba iohi ia kane na ka liang jong ki Magistrate kila khat hynniew ngut ki briew ban leit ia kren bad u Chief Secretary jong ka jylla, hynrei kane ka kynhun kala dawa ba dei ban ioh ban ia kren markhmat bad u myntri rangbah ka jylla ha kaba kin ai ia dorkhas ha u myntri rangbah ka jylla ban pynsngew ha u mar khmat ia ka sur jong u paidbah.
Na ka liang jong u myntri rangbah ka jylla u la pdiang sngewbha ia ki ban ia kren bad ban pdiang i aka dorkhas kaba kila wanrah. Kine ki hynniew ngut kiba la kam ba ki wan na ka sur jong u paidbah ha dien ba la dep ban ia kren bad u myntri rangbah, haba kren ha ki nongthoh khubor kila pynpaw ia ka jingsngew kmen ka jong ba u myntri rangbah u la shim khia ia kane ka jingdawa jong ki paidbah ha kaba ia dei bad ka Them Motor.
Ka jingwan jong ki ban ia kynduh ia u myntri rangbah ka long ruh ban pynsngew sha u ia ka jingeh kaba ki ba duk ba rangli kila ia kynduh na ka daw jong kane ka jingiakhih kaba la neh bun sngi mynta. Kila pynpaw ba kin rah ia kane ka khubor sha ki paidbah ba ka sorkar kala shim khia ia ka jingdawa jong ki paidbah bad kin kyntu ia ki paidbah ba kin sangeh noh kane ka jingiakhih ban ai lad i aka sorkar ba kan pyndep iala ka kamram jong ka.
U myntri rangbah ka jylla u Conrad K Sangma haba jubab i aka jingioh rung jong ki briew ha phyllaw jong ka secretariat, u myntri rangbah u la ong ba kine ki briew kim shym la wan ban pynkulmar hyrei ki wan ban pynsngew ia ka jingeh kaba ki ia kynduh bad ban buh ia ki jingdawa ha khmat jong ka sorkar ia kaei kaba ki sngew don kam ban dawa ha kaba u la pdiang sngewbha ia ki ban ia kren na ka bynta ban wan rah jingsuk ha kane ka nongbah Shillong.
