Shillong, Naiwieng 06: U Lat jong ka jylla u Tathagata Roy mynta ka sngi u la pynbam smai ia u Pronoy Kumar Musahary kum u Chairperson jong ka Lokayukta, ha Raj Bhavan Shillong, ha kaba la ia don lang ki heh sorkar ban sakhi ia kane ka sngi.
Ban shu pynkynmaw ba ka jingdawa na ki seng bhalang ban don ia ka Lokayukta hapoh ka jylla kala iaid la katto kattne snem bad na pdeng kiba kham kren bha ia kane ka phang dei u bah Michael Syiem u nongialam jong ka kynhun Maitshphang Movement bad kane ka dei ban long katkum ka Lokpal Act jong ka sorkar.
Ha dien ka jingiai dawa jong kiba bun ki seng bhalang ba dei ban don ia ka Lokayuta ka sorkar jylla ha u snem 2014, kala wanrah hapoh ka iing dorbar ia ka Meghalaya Lokayukta Bill 2014, bad la pdiang ia ka da ka iing dorbar bad ban pynkhlain shuh shuh iala kala don ruh ka jingpynkylla.
Wat la ka iing dorbar thawain ka jylla kala pdiang ia ka bill naduh u snem 2014, hynrei ka sorkar jylla kala shem jingeh ban ioh ia briew ban don ha ka shuki, da kane ka jingshim smai jong u Musahary mynta ka sngi ka Lokayukta Act jong ka sorkar jylla kala long ka ain kaba pura.
