Shillong, Kyllalyngkot 22: Mynta ka sngi ka Coordination of Hynniewtrep Social Organization (CoHSO) kala khot ia ka jingialang jong ki seng sain pyrthei ki rangbah shnong ki seng bhalang bad kum juh ia ki long kmie ban ia kren halor ka Citizenship (Amendment) Bill, 2016 kaba ka sorkar BJP ha Delhi ka kwah ban pdiang ia kane ka Bill.
U Chairman jong ka CoHSO, u Bah Roykupar Synrem haba kren ha dien jingialang sha ki lad pathai khubor u la ong ba ha dien ka jingiamir jingmut kila shim ia ka rai ban pynpaw ia ka jingpyrshah kum ka jaidbynriew ia CAB, 2016 da kaba pynlong ia ka jingiaid paidbah na Madan Iewrynhep sha Madan Malki ha ka 31 tarik mynta u bnai.
Na ka liang jong ka CoHSO kala iohi ia ka jingpyrshah jong ka sorkar jylla ia kane ka CAB, 2016 ym tang ba kala shim ia ka rai ha ka kabinet, hynrei kum ka hynhun sorkar kala leit ban pynpaw ia ka jingpyrshah ha khmat jong u myntri kam poh iing ka sorkar pdeng u Rajnath Singh.
Kane ka jingleh jong ka sorkar kam pat biang, kum ki paidbah jong ka jylla ruh ki hap ban pynpaw sha ka pyrthei ba ka sorkar pdeng ka dei ban tip ba ki briew na kane ka jylla Meghalaya ka pyrshah ia kane ka Bill da kaba pynlong ia kane ka jingiaid paidbah ba ka sorkar pdeng kan iohi.
Na ka liang jong ka CoHSO, ka kyntu ia baroh ki myntri sorkar naduh u myntri rangbah ka jylla, ki MDC jong ki lai tylli ki District Council, ka KHADC, JHADC bad kum juh ia ka GHADC ba kin poi lang ha kane ka jingiaid paidbah ban pynpaw ia ka jingpyrsha ia kane ka Bill.
U Bah Synrem u khot u wer ia baroh ki paidbah ba kin ia mih paidbah ha kane ka sngi ban ia shim bynta ha kane ka jigniaid paidbah kaba jai jai ban pynpaw ia ka jingpyrshah ia ka CAB.
Na ka liang jong ka CoHSO ka khot ia kane ka jingiaid paidbah ka long ban pynisha ka sorkar ia ka jingpyrshah shuwa ba ka dorbar bah jong ka Ri India kan sdang biang ia ka jingiashong dorbar namar mynta kane ka Bill ka don hapoh jong ka Rajya Sabha.
