Shillong, Nohprah 09: Ka seng Hynniewtrep Youth Council (HYC) kala pynkut ia ka jingshah thngan kaba lai sngi ka jong ka mynta ka sngi ha jan additional secretariat mynta ka sngi da kaba pynbna artad ia ki jingiakhih ba don dang beteng ha ka jingdawa ia ka Inner Line Permit ILP) ha kane ka jylla.
Ha kane ka sngi na ka liang jong u general secretary jong ka seng u Bah Robertjune Kharjahrin u la ong ba namar ka jingleh bym suidniew jong ka seng Congress kaba don ha ka bor synshar ia ki jingdawa jong ka seng khamtam eh ia ka ILP, ka seng kala shim ia ka rai ba kin sdang noh ia ka jingialap “Clean Congress Campaign 2018”. Ka seng kan ia lap pyrshah ia baroh ki MLA kiba kyrshan ia ka sorkar Congress namar kim shym leh ei ei ha kaba ia dei bad ka ILP.
Ka jingshong ia ka dorbar tlang ka dang don sa ar sngi, kin ia peit hato ka sorkar Congress hapoh ka jingialam jong u Dr Mukul Sangma kin wan lam ne em ia ka rai sorkar hapoh ka iing dorbar thawain ban pyntrei kam ia ka ILP ha kane ka jylla, lada kam lah ban leh ka jingialap pyrshah ia ka seng Congress kan iaid sha khmat.
Ha ka jingkren jong u president ka seng u Bah Peter J Lawai, u la ong ba ka sorkar kala leh aiu na ka bynta ka roi ka par jong ki paidbah ha kine ki san snem kiba la leit noh noh, la ka long ha ka rep ka riang, ka pule puthi, ka koit ka khiah ha baroh kawei ka jylla. Ka HYC kan nym sngap jar ha kaba ia dei bad ka jingdawa ia ka ILP ban iada ia ka jaid bynriew ha kane ka jylla Meghalaya.
Ha kane ka sngi na ka liang jong ka seng kala pynlait paidbah ruh iaki 34 tylli ki jingkylli na ka bynta ki seng sain pyrthei ha kane ka jylla kiba dang pynkhreh mynta na ka bynta ka election. Ia kine ki jingkylli kin sa phah sha baroh ki seng sain pyrthei bad la buh por ba kin jubab hapoh ka 20 sngi. Hynrei sha ka seng Congress kin nym phah ia kine ki jingkylla.
Haba ia dei bad ka seng BJP ka seng kala buh tam ia ki jingkylla ban ia shai paidbah halor ki ar tylli ki bynta hato ka BJP ka don shisha ia ka jingthmu ban pynkylla ia ka Ri India kum ka Ri Hindu bad kawei pat ka jingkylli ka long halor ka jingiadei ka seng BJP kaba ka kynhun RSS.
