Shillong, Naiwieng 23: Ka Central Election Committee (CEC) jong ka Peo
ple’s Democratic Front (PDF) kaba la shong pyrkhat kam mynta ka sngi ha ka ophis treikam jong ka party ha Nongrim Hills-Shillong ka la rai ban pynbna paidbah ïa ka thup kyrteng ba nyngkong jong ki kyrtong ki ban ïakhun ha ka MLA Election 2018 na ki 11 tylli ki konstitwensi.
La ioh jingtip ruh na u General Secretary jong ka party Bah. Auspicious L Mawphlang ba ka Central Election Committee shen kan sa pyllait ruh sa ïaka thup kyrteng ba ar. U President jong ka party Bah. Ivanlumlang Marbaning u ai khublei bad kyrkhu kyrdoh ïa ki kyrtong ki ban ïa khun na ka party PDF.
Ki kyrtong jong ka seng PDF, ki long u Bah Draison Kharshiing na 1-Nartiang Constituency, u Bah James Shylliang na 8-Mawhati, u Bah Jason Sawkmie Mawlong na 11-Umsning, Bah Hamletson Dongling na ka 20-Mylliem, Bah Latiplang Kharkongor na ka 21-Nongthymmai, Kong Grace Mary Kharpulri na 27-Pynursla, Bah Banteidor Lyngdoh na ka 29-Mawkynrew, Bah Good Leaderson Nongsiej na 32-Nongstoin, Bah Morningstar Mawsor na 34-Mawsynrut, Bah Airmarshal Diengan na 35-Ranikor bad u Bah Hedrian Lyngdoh na 36-Mawkyrwat.
Na kine ki 11 ngut ki kyrtong kiba la pynbna mynta ka sngi hyniew ngut ki dei ki MDC ba mynta hapoh jong ka KHADC, u Bah Draison Kharshiing u la dei teng u MLA ba rim jong 1-Nartiang Constituency bad mynta un ia khun na ka seng PDF na katei ka juh ka jaka.
