Shillong, Nohprah 07: Ka Central Election Committee (CEC) jong ka People’s Democratic Front (PDF) kaba la shong pyrkhat kam mynta ka sngi ha office treikam jong ka party ha Nongrim Hills-Shillong ka rai ban pynbna paidbah ïa ka thup ba-ar ki kyrteng jong ki kyrtong ki ban iakhun ha ka MLA Election 2018 na ki 8 tylli ki konstitwensi.
La ioh jingtip ruh na u General Secretary jong ka party Bah Auspicious L Mawphlang ba ka Central Election Committee ha ki khyndiat sngi kiban wan kan sa pyllait ruh sa ïaka thup kyrteng ba lai. U President jong ka party Bah Ivanlumlang Marbaniang u ai khublei bad kyrkhu kyrdoh ïa kitei ki kyrtong ki ban ïa khun na ka party PDF.
Shuh shuh u la ong ruh ba mynta ka party kan phai khmat sa sha Garo Hills ban pynbna ïa ki kyrtong kiba ka party kan pynïakhun na ki katto katne ki Constituency bad ka party kan pynkot sha ki 40 tylli ki constituency ha ka Jylla hi baroh kawei ha shuwa ban wan ka MLA Election 2018.
Ki kyrtong kiba ka party PDF kala pynbna mynta ka sngi ki long, u Bah Arbinus Lyngdoh na ka 12-Umroi, u Bah Highlander Kharmalki na ka 13-Mawryngkneng, u bah James Ban Basaiawmoit na ka 14-Pynthorumkhrah, ka Kong Sarita Lyngdoh na ka 15-Mawlai, Bah Judah J.M. Wahlang na ka 23-Sohiong, Bah Leston Wanswett na ka 26-Shella, Bah Councellor S. Wahlang na ka 30-Mairang bad u Bah Synranlang Nongshlong na ka 33-Rambrai Jyrngam.
