Shillong, Nailur 29: Ka tnad pule jong ka sorkar jylla mynta ka sngi kala pynbna kyndon thymmai ban plie ia ki skul ha Sor bad Nongkyndong, kane ka jingpybna kaba la pynmih mynta ka sngi kan tri kam naduh ka 01st Risaw 2021.
Ia ki skul ha ki jaka sor, na ka byna ki klas I haduh V ki lah ban shu leit shim jingthoh na skul lane kin pynlong da ka Online, ia ki klas VI haduh klass XII la sha ban plie ia ki jaka pule ba kin leit sha skul man ka sngi. Katba ha ki nongkyndong, la shah ban plie ia ki skul naduh Klass I haduh klass XII.
Haba ia ei bad kane ka jingbthah ban plie ia ki skul na ka liang jong ka sorkar kala pynmih ruh ryngkat ki kyndon kiba la don haduh 30 tylli, ka kyndon kaba nyngkong ka long ba don kam ia ka jingbit jong ki kmie ki kpa lada phah ia ki khun sha skul.
Ka jinghikai ka dei ban long hapdeng lai haduh saw kynta bad ki skul ki dei ban don ka jingiakren ia sngewtuh bad ki jaka sumar ba don ha jan eh ban peit ba lada don kano kano ka jingdon kam kaba kyrkieh ha ka koit ka khiah.
La ai bor sha ki Deputy Commissioner ban peit ia ki jaka la ki long kiba la biang ban plie ia ki skul ne ban khang ia ki, ha ki District dei ban don ia ka kynhun kaba kyrpang ban peit ia ka jingplie ia ki skul ha kaba DC kum shongknor, DSEO kum member secretary bad kin don ki principal ruh.
La bthah ia baroh ban but ryntih ia ki jingbthah jong ka tnad ka koit ka khiah ha kaba ia dei bad kane jingialeh pyrshah ia ka khlam COVID-19, ban ia da na ka jingsaphriang kane ka jingpang.
