Shillong, Nailur 29: Ka seng Mawsynram Constituency Welfare Organisation Shillong(MCWO) mynta ka sngi kala pynlong ia ka jingpynkub burom ia ki samla ka Mawsynram Constituency kiba la pass bha ha ki eksamin jong ki, kiba la ioh palat ia ka 60%. Baroh kiba ioh ia kane ka khusnam naduh kiba pass ia ka SSLC haduh ka kyrdan pule ba ha khliehduh kila long 150 ngut.
Haba kren ha kane ka jingpynkup burom kaba la long mynta ka sngi Khasi National Dorbar Hall, Mawkhar u bah Himalaya Shangpliang u ba dei u MLA jong ka thain u la ong ba kane ka jingai khusnam myna ka long tang ia kiba la pass bha ha ka jingpule ka jong ki hynrei nangne sha khmat dei ban phai ruh sha kiba la leh bha ha ka jingialehkai, ka pud ka tem ruh kumjuh.
Ha kane ka sngi u la ong ba ha u snem ban wan ka jingpynkup, ka dei ban long ruh ia ki skul kiba lah ban pynpass bha ia shibun ki khynnah pule bad ha kane ka phang dei ban ai ia ka kyrdan kaba nungkong, baa r bad b alai. Kane kan iarap ruh ba kan don ka jingiakop hapdeng ki skul bad ka khusnam kan long da ka pisa.
Na ka liang jong u MLA u la kyntu ruh ia ka MCWO ba kan pyrkhat ban plie ia ka jaka ia mir jingmut, ka jaka ai jinghikai ha ki liang bapher bapher. Haba ia dei bad ka iing basa ban sah ki briew kiba wan shah sumar sha Shillong ia mynta yn shuwai noh katba ym pat lah ban ioh la ka jong. Haba ia dei bad ka jingiarap ia kiba pang ba shitom la ong ba dei ban don ka mang pisa ban iarap katba lah ei ha kaba ia dei bad ka jingiarap ban siew ia ki bill ha ki hospital.
Haba ia dei bad ki samla pule na ka liang jong u MLA ka Mawsynram u la kyntu ba kin long kiba trei minot namar ha kane ka juk kaba mynta ka dei ka juk jong ka jingialeh bad kimd ei ban ai lad ia ka jingjaituh lada kileh ha kane ka rukom kiwei kin sa ioh lad ban jam sha khmat. Ha kane ka sngi u la ai khublei kyrpang ia ki kmie ki kpa, ki nonghkai ba dei lyngba jong ki ba ki khun jong ki kila poi sha khmat ha ka jingpule.
Kiwei kiba la kren ha kane ka jingialang pynkup burom ia ki samla pule ka thain Mawsynram ki long u president ka seng u Bah A S Katrai ha kaba u la ong ba ha u snem ban wan kin shim noh tang ia kiba ioh 70% shaneng. U Rev P Hynniewta, u Bah Rudy H Shangpliang, ha kane ka sngi la pynphuh pynphing ia kane ka sngi da ki jingrwai bad ka jingiadon lang shibun ki riew rangbah ka thain.
