Pynbna u Bah Metbah ha Nongkhlaw ban tei ia ka TSIKCC ban pynsah nam ia u Syiem Tirot Sing

Shillong, Naitung, 17: Ka jingpynsahnam pynsah kyrteng ïa ka kyrteng u Pa’iem Tirot Sing, u Syiem bakhraw ka Hima Nongkhlaw kan nang ïai im pateng la pateng namar ka Sorkar ka la pynkhreh ban tei ïa ka Tirot Sing Indigenous Knowledge and Cultural Centre (TSIKCC) ha ka Hima Nongkhlaw.

Ïa kane la pynbna da u Bah Metbah Lyngdoh, Myntri ka tnat Tourism bad kiwei kiwei ki tnat haba kren kum u Kongsan ha ka jingrakhe ïa ka lyngkhuh sngi ïap kaba 183 jong u Pa’iem Tirot Sing kaba la long mynta ka sngi baar ha Nongkhlaw.

U Bah Metbah u la ong ba ynsa tei ïa ka Tirot Sing Indigenous Knowledge and Cultural Centre (TSIKCC) ïa kaba la mang pisa T.2.5 klur bad ïa ka kam ladep aiti ban ngi khmihlynti ba sa tang katto katne sngi yn sa lah ban sdang pyntrei noh ïa kane ka kam,” ong u Bah Metbah.U la ïathuh ba ka jingpynlut pynsep na ka bynta ban tei ïa kane ka Centre ka dei kaba la bei lyngba ka Ministry of Tribal Affairs jong ka Sorkar Pdeng.

Haba kren halor ka jingkyntiew ïa ki kam jngohkai pyrthei, u la ong, “kum u Myntri uba peit ïa ka tnat jngohkai pyrthei nga don ka jinganngud ban pynbha ïa ka Krem Tirot bad ïa ka Khasi Patriotic Home.  Kine ki dei ki ar tylli kiei kiei kiba ngi dei ban pynneh pynsah khnang ba ki pateng ki ban wan kin dup tip shaphang ki kambah jong une u Syiem bakhraw jong ka ri Khasi uba la len lade ban pha ïa la ka jong ka jingim ban ïakhun pyrshah ïa ka bor bakhlaiñ jong ka Sorkar Bilat.”

Ha kane ka sngi u Bah Metbah u la plie ïa ka madan ïalehkai ha Nongkhlaw kaba la ainam ai burom ha u Pa’iem Tirot Sing ïa kaba la mang pisa T.41.71 lak.Ka don ruh ka jingthmu ban pynlong ïa ka jinglehkai phutbol ha kane ka madan ha ka jingwan ka National Games ha u snem 2022.

Shwa kane, u Bah Metbah kynthup ïa i Kong Matsiewdor War Nongbri, Director ka tnat Sports and Youth Affairs bad ka tnat Arts and Culture, kaba long ka Symbud Kongsan, u Pa’iem PM Syiemlieh,  Syiem ka Hima Nongkhlaw, u Bah Plingstar Nongrang, Sordar Nongkhlaw, ka  Synjuk ki Sordar Shnong, bad ki paidbah ki la pynlong ka jingleit buh syntiew hakjat u durmot jong u Pa’iem Tirot Sing ba la shna ha Khasi Patriotic Home bad ka jingsngap jar kaba ar minit kum ka dak ka jingburom ïa ka mynsiem ba khladnoh jong une u khlawait ka ri Khasi.

La pynbyrngia ïa kane ka jingkynmaw burom ïa ka lyngkhuh sngi ïap jong une u Syiem bakhraw ka Ri-Khasi da ki jingrwai, ki jingshad tynrai bad ka jingïalehkai drama halor ka jingim bad ki sngi khatduh jong u Syiem Tirot Sing.

Ha kane ka sngi kala don ruh jingbuh syntiew ha kane ka nongbah Shillong ha u Mot jong U Tirot Sing Syiem ha State Central Library da ka seng bhlang HANM bad ha ka krem Tirot da ki seng bhalang kum ka FKJGP bad ka KSU ha Mawiewrynhep ha Nongthymmai ban burom ia ne u Syiem ba khraw ha kane ka sngi iap ba 183 snem ka jong u.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet