Shillong, Naitung 06: U myntri rangbah ka jylla u Dr Mukul Sangma ha dien ka jingia kynduh ia ki saw ngut ki MLA, ki MDC ki rangbah shnong bad ia ki seng bhalang ha Secretariat u la pynbna ban plie noh ar tylli ki Block, ka Mawlai Community bad Rural Development Block bad kawei pat yn dang jer kyrteng katkum ka jaka ba kin buh ia ka Block.
Da kane ka jingpynbna jong u Myntri rangbah ka jylla, ka long ba ka Mawlai kan don noh la ka jong ka Block, bad kawei pat ka Block kan kyntup ia ka ki jaka kiba dei na ka Nongthymmai Constituency, ka Pynthorumkhrah Constituency bad kan kynthup ia ka Mawryngkneng Consituency.
U myntri rangbah u la ong ba ka jingthmu jong ka sorkar hi ka long ban kyntiew ia ka roi ka par ha ka jylla bad ha ka jingiakren jong u bad ki ophisar jong ka tand pla pisa bad jong ka planning kila shem ba lada don sa kawei ka block ruh kan dang biang lada shim ia ka jingdon jong ki paidbah nongshong shnong katkum ka Census 2011.
Lada shim katkum ka census jong ka snem 2011 ka Mylliem Block ka don haduh lai lak tam bad mynta lei kala dang kiew shuh shuh ka jingdon briew, halor jong kane ka jingdon jong ki briew na ka liang jong ka sorkar kala shim ia kane ka rai ban phiah biang sa kawei ka Block namar ba bun ki skhim jong ka sorkar la pyniaid lyngba jong ki Block.
Da ka jingshim ia ka rai ban plie noh sa kawei ka block, ha kane ka block thymmai yn shim na ki bynta jong ka Mylliem Block bad kum juh na ka Mawryngkneng C&RD Block. Da kane ka jingpynbna jong u myntri rangbah ka jylla baroh saw ngut ki MLA, u Bah Embhalang Syiemlieh, u Bah AL Hek, u Bah David Nongrum bad u Dr Jemino Mawthoh bad ki rangbah shnong ki seng bhalang kila pynpaw ia ka jingsngewnguh ia u myntri rangbah halor kane ka rai ban plie noh ar tylli ki Block.
