Pynbna u Myntri Rangbah ka jylla, ka sorkar kan nym bat shuh ia ka tulop u bnai Jymmang 2020

Shillong, Jymmang 27: U Myntri Rangbah ka jylla u Conrad K Sangma mynta ka sngi u la pynbna ba ka sorkar kala shim ia ka rai ban nym bat shuh ia ka tulop jong ki nongtrei sorkar kaba dei jong u bnai Jymmang 2020 ia kaba kin sa ioh ha u ban Jylliew u ban wan.

Haba kren ha ki lat pathai khubor mynta ka sngi u myntri rangbah ka jylla u la pynshai ba ka sorkar kala shim ia katei ka rai ha u bnai ba la dep ka long namar ka jingwan lap kynsan kane ka khlam COVID-19.

Ha katei ka por ka sorkar kam thikna shuh ia ka rukom ioh ia ka khana bad ia ka bhah na ka sorkar, kala don ka jingantad ba kan sa hiar ha ka jingioh ia ka bhah dei na kane ka daw ba ka sorkar kala shim ia ka rai ban bat shipor ia ka tulop jong ki nongtrei na ka bynta u bnai Iaiong bad Jymmang.

U myntri rangbah u la ong ba ka jingioh ia ka bhah na ka sorkar pdeng kala hiar hynrei kam shym hiar pat kumba kila antad, ka jingkhublei ka leit sha ka sorkar pdeng ha kaba ia dei bad kane ka jingai ia ka bha sha ka sorkar jylla na ka sorkar pdeng.

Haba ia dei bad ka khajna kaba dei jong ka sorkar jylla kala hiar mynta shibnai bad ka don ka jingkyrmen ba ha kine ki ar bnai ban sa wan kan sdang ban kiew biang namar la plie bun ki kam ki jam. Ha ka juh ka por ka bhah kaba ka jylla ka dei ban ioh na ka sorkar pdeng ruh kam shym la hiar kum ba kila pyrkhat.

Haba la peit ia ka jingwan ka pisa, ka sorkar kala shim ia ka rai ban nym bat shuh ia ka tulop jong u bnai Jymmang ia kaba ki nongtrei sorkar kin sa ioh ha u bnai Jylliem u ban wan. U myntri rangbah u la ai khublei ia baroh ki nongtrei sorkar kiba sngewthuh ia kane ka jingeh ka sorkar.

Ha ka juh ka por u myntri rangbah ka jylla u la ong ba na ka bynta ki bnai ki ban dang wan ka shong ha ka jingkylla jong ka por bad ka shong ha ka jingioh ia ka bhah na ka sorkar pdeng.Ha kane ka jingkren ha ki lat pathai khubor la don lang u Deputy Chief Minister u Bah Prestone Tynsong bad u myntri ka koit ka khiah u Bah AL Hek.

What Next?

Recent Articles

Leave a Reply

Submit Comment

*