Pynbun ka mang tyngka ia ka tnad ka rep ka riang, dawa ka HFU na u Conrad 

Shillong, k. Lyngot 12:Ka Hill Farmers Union (HFU) Central Body ka la dawa na u Myntri Rangbah u Conrad K Sangma ba ka sorkar jylla ka dei ban pynbun ia ka mang tyngka na ka bynta ka tnad ka rep ka riang bad kumjuh ruh ia ki tnad sorkar kiba iadei bad ka kam rep kam riang.

U President jong ka HFU Central Body bah Commander Shangpliang bad u Bah Allfonbirth Kharsyntiew General Secretary mynta ka sngi ki la leit iakynduh ia u Conrad Sangma ha ophis treikam jongu ha kaba ki la leit rah ia ki 7 tylli ki mat jingdawa kiba dei naka bynta ban kyntiew iaka rep ka riang ha ka jylla baroh kawei.

Napdeng kitei ki 7 tylli ki mat jingdawa kaba nyngkong ka dei halor ka jingdawa ban pynbun iaka mang tyngka (budget allocation) iaka tnad ka rep ka riang bad ki tnad kiba dei khmieh halor ka kam rep kam riang khnang ba kan long ka jingmyntoi naka bynta ki nongrep.

Kawei pat ka jingdawa ka long ba ka sorkar kan ai noh da ka jingpynbna (notification) ba u snem 2021 un dei u snem jong ki nongrep (year of the farmers). Ka HFU ka la dawa ruh na u Conrad ban ai jingiada ia ki nongrep kiba rep ha khappud khamtam bad ka assam halor ka jingshah pynjulor jong ki jingthung jingtep ha ki pulit assam.

La dawa ruh ba dei ban ai bai lut ksan ia ki nongrep ngap kiba la shah pynjulor ha ka dngiem. Shuh shuh la dawa ruh ban peit ba ki nongrep kiba wan na ki nongkyndong sha Shillong da ki kali kamai ba kim dei ban shah shim kabu ha kaba iadei bad ka bai kali. Ka seng ka la pynpaw ba lada ka jingthep briew ka long tang mar shiteng, ki kali kamai ki lah ban shim tam, hynrei lada ka jingthep passenger ka long kumba ju long ha ki por baroh ka bai kali kam dei ban tam.

Nalor kane ka seng ka la dawa ruh ban pyntreikam noh ia ka market intervention scheme khamtam haba don ka jinghiardor jong ki mar rep. shuh shuh u bah Commander Shangpliang President bad bah Allfondbirth Kharsyntiew General Secretary ki la kyrpad ruh ia u CM ban kyrpad ia ka sokar India ba kan pynbeit noh kham kloi halor ka jingiakhih jong ki nongrep ha Delhi halor ki 3 tylli ki ain halor ka rep ka riang kaba dang shu dap pynlong ain dangshen.

Haba iakren bad u President ka HFU bah Commander Shangpliang u la iathuh ba na ka liang jong u Conrad Sangma u la kular ban shimkhia halor kitei ki mat jingdawa ba la buh da ka seng.

Ha kane ka juh ka sngi ka seng ka la ai ruh iaka memorandum sha u Chief Minister halor ki mat jindawa kiba la mih na ka Dorbar jong ki nongrep (2nd Meghalaya Farmers Parliament ) kaba la long ha Tura a u snem 2019.

 

What Next?

Recent Articles

Leave a Reply

Submit Comment

*