Shillong, Lber 09: Ka seng lehnoh Garo National Liberation Army (GNLA) mynta ka sngi kala dang shah sloit shuh shuh ia ka bor trei kam jong ka ha kaba u foreign secretary ka seng u Briyan R Marak ia kaba la tip kum Millam 40 snem ka rta u la wan ban pyndem ia lade ha khmat jong ki pulit jong ka South Garo Hills District.
U Briyan u dei na Tura na ka dong Ringregittim , jong ka West Garo Hills District, u la wan ban pyndem ia lade ha khmat jong ki pulit jong ka South Garo Hills ha ka jingiadon lang ka Deputy Commissioner ka Shella N Marak IAS, u Superintendent ki pulit u Abraham T Sangma, ha kaba ki nongialam niam bad ki seng bhalang ruh kila ia don lang.
U Briyan u la pyniasoh ia lade bad ka seng lehnoh GNLA ha u snem 2011 bad mar ia leit bad kane ka seng la thung ia u kum u Foreign Secretary jong ka seng bad la phah ia u ban sah ha Bangladesh, ha dien katto katne por u la shah kem ha ki pulit jong ka Bangladesh bad u la shah ha phatok kumba shiphew bnai ei ei ha Kathie ka Ri.
Ka kam kaba la aiti ha u kum u foreign secretary ka long bay n ia kren bad kiwei ki seng lehnoh ha kaba ia dei bad ka jingpynioh ia ki tiar ialeh bad kum juh ban pynbiang ia ka rukom trei kam jong ka ha ka jingiadei bad kiwei ki seng lehnoh kiba don ha Bangladesh. Kane ka jingwan pyndem noh ka jong u sha ki bor jong ka ain kala dang pyntlot shuh shuh ia ka seng GNLA.
