Shillong, Lber 02: u Commander In Chief jong ka seng lehnoh A’chik Songna Anchakpagipa Kotok (ASAK) kaba la pynshong syier ia ka South Garo Hills District hapoh ka jingialang u Reding T Sangma, mynta ka sngi u la leit ban pyndem ia lade ha khmat jong ki pulit ha ryngkat ki dkhot jong ka tei ka seng lehnoh baroh ha kaba la don lang ki nongialam niam bad ki seng bhalang.
Kane ka kynhun seng lehnoh ha kane ka sngi kila aiti ruh ia ki tiar ialeh ki jong ki ha khmat jong ki pulit, nalor u Reding kiwei ki dkhot kiba la pyndem ki long u Tengrang A Sangma,u Pintu R Marak,u Kiljang M Sangma bad u Seldom K Sangma, kiwei pat ki long u Hame Ch Marak,u Baini Ch Marak bad u Tengman M Sangma.
Da ka jingpyndem noh jong kane ka kynhun lehnoh ha South Garo Hills kiba la pynshong syier ia ki paidbah, ka seng lehnoh kaba sah mynta kadei sa tang ka GNLA kaba dang ialeh pyrshah ia ka sorkar.Na ka liang jong ki pulit mynta ki dang ia leh ban pynjem khnap sa ia kane ka seng lehnoh.
