Pyndep ki sankur-khatweikur ka Hima Mylliem ia ka lehniam pom blang ha Iewduh

Leh niam pom blang iewduhShillong, Naiwieng 12: Ka nguh blei ka dem blei hapoh jong ka Iewduh da ki san kur bad ki khatwei kur jong ka Hima Mylliem ia ka lehniam pom blang ha Iewduh la long mynta ka sngi kaba dei ka sngi Iewrynhep ia kaba la but naduh ki por kulong kumah.

Ia kane ka jingleh niam la leh ka san kur bad 11 kur jong ka Raid Mylliem, da ka knia ka khriam, da ki blang lieh sada kaba khlem thoh dak ei ei bad u sniang iong ba khlem thoh dak bad ki syiar ban nguh ban dem katkum ki riti dustur jong ka hima bad ka raid.

Ia ka jinglehniam la sdang ha khlieh iewduh ha kaba la pyndep ia kane ka niam ka rukom ha kaba ki khun kihjar jong ka hima khamtam eh na ka kur san kpoh bad khatwei kpoh jong ka Raid mylliem, ha kaba u pa’im  Ricky Nelson Syiem ruh u la ia don lang ha ryngkat kiba khraw ba tri ka hima.

Ha dien ka jingleh niam na khlieh iewduh la wan ban pyndem sa ia ka niam ka rukom ha kjat jong ka Iewduh ryngkat ka knia ka khriam ha Basa Tympew bad la but sa ka shad ka kmen da ki khun ki hajar jong ka Raid Mylliem.

Ha kane ka sngi lehniam kaba shisien shisnem na ka liang jong ka hima kala khang ia ka iew baroh shisngi namar kane ka iew kam dei tang ka iew kum ba long lem kiwei ki iew hynrei ka dei ka iew niam iew kyntang kaba ka hima ka da pynlong ia ka nguh dem blei da ka niam ka rukom kaba kila bat na duh ki por u myn ba rim ba jah bad ka dang iaid beteng haduh kine ki sngi.

Ha kane ka jinglehniam pom blang mynta u snem 2017, kiba la mih khmat ia ki san kur kiba ia don bynta lang ha kaba pyndep ia ka niam ka rukom ki long, na ka kur Kharhongor u Bah Chestar, na ka kur Sohtun u Bah Shanborlang, na ka kur Kurkalang Bah Moneywell, na ka kur Marbaniang bah Charles, na ka kur Nongkhlaw Rngi u Bah Shaphrang. Ba tan ia u blang u bah Gilfred Nongdhar. Ia ka naim ka rukom baroh la pyndep da u bah Pran Jala u nongialam ka seng ki nongshad nongkhein.

What Next?

Recent Articles

Leave a Reply

Submit Comment
*