Shillong, Naiwieng 17: U myntri ka sorkar pdeng ba dei peit ia ka Ministry Tribal Affair u Jual Oram mynta ka sngi u la plie ia ka iing bala dep shna thymmai ia kaba la ai nam “Rev. Fr. D.J. Wollaston building” jong ka St. Anthony’s College.
Haba kren ha kane ka jingialang ban plie ia kane ka jaka pule kaba thymmai ban hikai ha kaba ia dei bad kane ka juk kaba mynta ia kaba la tip kum ka “Digital Learning Centre” na ka liang jong u myntri ka sorkar pdeng u la ai ka jingiaroh ia kane ka jaka pule kaba ai ka jingshakri ia ki paidbah ka jylla Meghalaya bad kum juh ia ka dong shatei lam mih ngi jong ka Ri India.
U myntri ka sorkar pdeng u la ong ba ka jylla Meghalaya ka dei ka jylla ka ban sa kiew bah ha ka ioh ka kot namar ka jinghikai ha kane ka jylla ka long kaba bha kaba lah ban wanrah ia ka ioh ka kot bad ka St Anthony’s ka dei kawei na pdeng kita ki jaka pule ha kane ka jylla Meghalaya.
La ong ba ka Ministry tribal Affair ka kwah ban pynkiew ia ka roi ka par jong ka dong shatei lam mih ngi jong ka Ri India kham tam ia ka jylla Meghalaya. Ka sorkar pdeng kala dep ban pynlait ka pisa T.127 klur hapoh jong ka Artikle 275(1) jong ka riti synshar jong ka Ri India ban pyntrei kam ia ki skhim kiba la phah da ka sorkar Meghalaya.
Mynta u snem la mang T.25 klur tyngka kum ka jingiarap ba kyrpang ia ka jylla ban kyntiew ia ka roi ka par ha kane ka jylla. U la kyntu ia ka sorkar jylla ba ia ka pisa kaba la ai da ka sorkar pdeng dei ban pyndon kam na ka bynta ka roi ka par ka jylla.
Na ka tribal Ministery kala depb an ai pisa ban shna ia ki ar tylli ki Eklavya Residential Model Schools bad katkum ka jingmang pisa jong ka sorkar pdeng kan sa shna ia kine ki skul ha man la ki District bad ki Block ha ki jaka ba don ki riewlum la kumno kumno 50% u la ong Oram. La ong ba 462 tylli ki skul kiba kum kane yn shna ha ka Ri baroh kawei ha kine ki san snem ban wan shen ia kane yn sa ioh ia ka jingmynjur jong ka Union kabinet.
Ha ka juh ka por u la kyntu ia ka sorkar Meghalaya ba kan pynshlur ban thung ia ki dawai kynbat bad kane kan iarap ia ki briew ban kiew ha ka ioh ka kot bad u la ong ba dei ban sangeh noh kane ka rep shyrti bad ka sorkar jylla ka dei ban pynshlur ia ki briew ban shim kabu ia ka skhim MSME jong ka sorkar pdeng.
Ha ka jingkren jong u myntri rangbah ka jylla Meghalaya u Conrad K Sangma ha kane ka sngi u la ong ba ka long kaba eh ban leh ei ei haba ymtip na ei ka pisa kan wan, hynrei ka St, Anthony’s College kala shim ia kane ka jingeh bad iaid sha khmat ha kaba pyndep ia kane ka jaka pule katba katkum kane ka juk mynta.
U la pynkynmaw ia kaei kaba u kpa jong u , u P A Sangma bam kwai ha dwar u blei u juh ong ban kyntiew ia ka jylla Meghalaya don kam ban pynkhlain ia ka pule puthi lada ym lah ban leh ia kane ka jylla kan nym kiew. La kyntu ia ki khraw pyrkhat ba kin ai jingmut sha ka sorkar kumno ban pynbha ia ka pule puthi ha ka jylla. Ha kane ka sngi la don lang ruh u Chairman jong ka State Planning Board u bah Lambor Malgniang.
