Shillong, Naiwieng 16: U myntri rangbah ka jylla u Cornad K Sangma haba kren ha ka sngi burom jong ki nongthoh khubor ia kaba la tip kum ka “National Press Day” u la ban jur ia kawei ka phang ban pyndon kam ia ki kor ki bor jong kane ka juk kaba mynta na ka bynta ban ai jingtip sha ki paidbah halor kiba bunta ki bynta.
U myntri rangbah u la ong ba ka long kaei kaei kaba don kam ban shim ia ki lad ki lynti kumno ban pyndon kam ia ki kor ki bor jong kane ka juk ia kaba la tip kum ka “Digital Age”,ha ka juh ka por u la ong ba don kam ban don ia ki ain kiba biang na ka bynta ban iada pat na ki kam sniew kiba mih laiphew jait bad ka sorkar jylla ka la iaid sha khmat ban leh ia kata.
Na ka liang jong u myntri rangbah u la ai khublei ruh ia ka Shillong Press Club kaba la kynjoh sha ka jingdap 25 snem kum ka kynhun ki nongthoh khubor. Ha kane ka sngi u myntri rangbah u la ong ba un ialeh katba lah ban ia kynduh ia ki paidbah ha kano kano ka por kaba u lait por.
Ha ka jingkren jong u Bah AL Hek myntri ba dei peit ia ki kam pathai khubor u la ong ba kum ki nongthoh khubor ki dei ban don ia ka jingkit khlhieh na ka bynta ka imlang sah lang ha kaba pyndep ia ka kam jong ki ban ai jingtip sha ki paidbah.
Ha kane ka sngi u bah Ebenezer Lyngwa na ka IT Department u la ai ia ka jingkren ha kaba ia dei bad ki kyndon ain ha kaba ia dei bad kane ka juk “Digital Age” u bah Christopher Rani, CEO, CR Projects u la batai ba kumno ban iada na ka jingsha pyndon kam bakla ha kaba pyndon kam ia internet. U la ong ba ia ki Mobile, ki PC ne ki Laptop kiba pyndon kam ia lade wat juh die dei ban shu pynjop.
Ha kane ka sngi la sam ruh ia ki khusnam sha ki nongjopha ki jingialehkai kiba bun jaid. Ha kane ka sngi ia ka jingkren ai khublei la ai ka Director jong ka tnad phah jingtip jong ka sorka jylla ka NM Nampui. Ia ka jingkren pdiang sngewbha la ai da u Bah David Laitflang President ka SPC bad ia ka jingialang la pyniaid da u Bah P Sohkhlet secretary SPC.
