Shillong, Risaw 13: Ka jingiakren halor ka jingai pisa ba kyrpang jong ka sorkar pdeng ia ki Autonomous Council ha kane ka dong shatei lam mih ngi jong ka Ri India, mynta ka sngi kala mih ka jingiakhluid ha ka jingiatai hapoh ka iing dorbar jong ka KHADC halor ka T.133 klur, ha ka ‘Zero Hour Discussion’ hapoh katei ka iing dorbar ia kaba la wan rah da u MDC jong ka Sohra u Bah D Wanlang.
Haba sdang ban ia kren ha kane ka mat ia kren ia kaba la wanrah da u tei u MDC, u Bah Donkupar Sumer MDC jong ka Umsning u la ong ba kane ka pisa kala pynpait ia ki seng sain pyrthei hapoh jong ka KHADC, um tang ia ki seng sain pyrthei hynrei wat ia ki tynmen Basan bad u la kynnoh ba ka T.16 klur kaba dang sah ka dei ka party fund jong ka PDF,
Haba ioh sngew ia ki kyntien Tynmen Basan na ka liang jong u CEM u Bah Pynshngianglang Syiem u la ieng bad ong ba ka jingpyndon kam ia ka ktien Tynmen Basan kam dei ban rung ha ka jingiakren hapoh ka iing dorbar bad na ka liang jong u CEM u la dawa lyngba jongu Chairman ba u tei u MDC jong ka Umsning u dei ban pan map hapoh ka iing dorbar.
Na ka liang jong u MDC jong ka Umsning haba ioh sngew ia kane ka jingdawa na ka liang jong u CEM ba u dei ban pan map halor ka jingpyndon kam jong u ia ka kyntien Tynmen Basan, u la pan map na ka iing dorbar bad ia kane ka jingkren tynmen basan kan nym rung shuh ia ka rekord jong ka iing dorbar.
