Mawphansnar, Kyllalyngkot 29:Ka Mawphansnar Sport and Cultural Club ka la pynhap pyrda noh ia ka Football Tournament 2018 jong ka ha kaba ka Laitlarem FC ka la long ka lahduh da kaba pynliem ia ka Seng Samla Nongspung lyngba ka tie breaker.
Ha katei ka sngi pynhap pyrda jong katei ka lympung ialehkai u Syiem ka Hima Nongspung Syiemship u Paiem Patrick Syiemiong u la long u Kongsan uba ha ka jingkren jong u ha ka jingialang hapoh ka jingpyniaid u samla Binsharsing Syiemlieh President ka club u la iaroh ia ka club halor ka jinglah jong ka ban kyntiew ia ki kam ialehkai ha ka thain da kaba pynlong ia kum kitei ki lympung ialehkai bad kyntu ruh ia ki rangialehkai ban kiar na ki jingkynja jingmlien kiba lah ban pyntroin noh ia ka sap ialehkai jong ki.
Kiwei pat kiba la ai jingkren ki kynthup ia u Bah Staising Kharbteng u samla treimon sngewbha ka thain, u bah Debruse Syiemlieh u Sordar ka shnong Mawphansnar, U bah Khrin Kharbani u Sordar Shnong Laitnongrim, U bah Mostarling Lyngdoh, ha ka jingdon ryngkat u Bah Kyntiew Syiemiong Secretary shnong Nongspung bad kiwei kiwei ki riew rangbah.
La don ruh ka jingialehkai paralok hapdeng ka Laitnongrim bad ka Wahramkhar, ha kaba ka Laitnongrim ka la pynliem ia ka Wahramkhar da 3-2. La sam ia ki khusnam sha ki nongjop bapher bapher da u Kongsan ha ryngkat kiwei kiwei ki riew rangbah kiba don lang ha katei ka sngi.
Ha kawei pat ka jingialehkai kaba la long ha shnong Sohpian, Ka Lukhyllem SC ka la long ka lahduh ha ka lympung ialehkai ki heprit kiba hapoh 12snem ka rta ha ka 5th Invitation Football Tournament 2018 da kaba pynliem ia ka Young FT lyngba ka tie breaker ha ka sngi kut jong ka lympung ialehkai ha ka 27tarik Kyllalyngkot ha madan ialehkai ka shnong Sohpian.
Ha katei ka sngi pynhap pyrda u Sordar ka shnong Sohpian u Bah Kmenlang Rani u la long u kongsan uba ha ka jingkren jong u ha ka jingialang hapoh ka jingpyniaid u Bah Bat Kharnaior President ka club u la iaroh ia ka jinglah ka club ban pynlong ia katei ka lympung ialehkai na bynta ka jingmyntoi ki heprit ka thain bad kyntu ruh ia ki rangialehkai ban pyndonkam kyrpang ia ka sap ba ki don da kaba kiar ruh ia ki kynja jingmlien kiba lah ban pyntroin ia ka met ka phad jong ki kum ki rangialehkai.
Kiwei pat kiba ai jingkren ki kynthup ia u Bah Staising Kharbteng u samla treimon sngewbha ka thain, u bah Dilansar Marwein ha ka jingdon ryngkat u Bah K .Jyrwa Secretary ka shnong, u bah An Syiemlieh bad kiwei kiwei ki riew rangbah.La sam ia ki khusnam sha ki nongjop bapher bapher da u Kongsan ha ryngkat kiwei kiwei ki riew rangbah kiba don ryngkat ha katei ka sngi.
