New Delhi, Naiwieng 03: Mynta ka sngi ka sorkar pdeng kala shim ia ka rai ban pynhiar ia ka khajna “excise duty” ia ka tetrol da T. 5 tyngka bad ia ka Diesel da T.10 tyngka naduh la shai ka sngi bad ka jinghiar dor kan long katkum ka jinghiar ka khajna bad kane kan long ka jingiarap ia ki nongrep ha kane ka por ot.
Ka sorkar pdeng kala bthah ruh ia ki sorkar jylla ba kin shim ia ka rai ban pynhiar ia ka khajna “Value Added Tax” ha kaba ia dei bad ka Petrol bad ka Diesel khnang ba kan iarap shuh shuh ban pynhiar ia ka dor jong ka Petrol bad ka Diesel.
Kane ka jingpynhiar ia ka dor jong ka khajna kan iarap shibun ia ki nongrep ha kane ka por ot ha dien ba kila trei shitom wat ha pdeng ka jingkhangdam kane kan long ka jingiarap kaba khraw ia ki nongrep.
Ha kine ki bnai kiba la dep ka jingkiew dor jong ka umphniang ha ki iew jong ka pyrthei kala pynlong ban kiew ka dor jong ka petrol bad ka Diesel ha ki jaka die petrol bad Diesel bad kane ka jingduna kala long ha kylleng ka pyrthei.
Na ka liang ka sorkar pdeng wat ha pdeng kane ka jingeh kala shim ia ka rai ban pynthikna ba kan nym don kano kano ka jingduna khamtam ka petrol bad ka diesel na ka bynta ka jingdon kam hapoh ka ri.
Kane ka jingpynhiar ia ka khajna ia ka petrol bad ka Diesel kan iarap ia ki briew ba kin lah ban krih ha ka leit ka wan jong ki bad kane kan iarap ha kaba kyntiew ia ka ioh ka kot jong ka Ri kane ka rai ban pynhiar dor ia ka Petrol bad Diesel kan iarap shibun ia ki paidbah.
