Pyni paidbah ka DIPR ia ki dur ba kyrpang ba plie ka Indira ia ka jylla Meghalaya, 1972

Shillong, Kyllalyngkot 21: Ka tnad pathai khubor jong ka sorkar jylla ka Directorate of Information and Public Relation (DIPR) mynta ka sngi ha ka jingrakhe ia ka jingdap 48 snem ka jylla Meghalaya kala pyni paidbah ia ki dur ba kyrpang ha ka sngi ba ka myntri rangbah duh jong ka Ri India ba la bam kwai ha dwar u blei ka Indira Gandhi kala wan plie ia ka jingioh jylla ha madan Garrison Ground, Shillong.

Ia kane ka jingpyninam ia kine ki dur la leh da ka jingiatreilang ka DIPR bad ka North East India Archive, jong ka St Anthony’s’ College Shillong. Ki paidbah kiba la leit ban ia shim bynta ha kane ka jingrakhe ia ka jingdap 48 snem ka jylla mynta ka sngi kila iohi ia kane ka jingbuh kyrpang ia kine ki dur ki ba pynsah ha ka khana pateng jong ka jingioh kylla.

Ki dur kiba kham kyrpang, ka jingiakynduh jong ki nongialam na kane ka jylla kaba kynthup ia u Captain Williamson Sangma, u Bah Brington Buhai Lyngdoh, Bah GG Swell, Rev J J M Nicols Roy bad ka Indira Gandhi ha Delhi shuwa ban pynbna ia ka jylla ha kaba baroh mynta kine kim don shuh ha kane ka sorkar pyrthei.

Ha kane ka sngi la buh ruh ia ka kyrteng jong baroh ki MLA kiba nyngkong kiba la jop ia ka ilekshon MLA sha ka iing dorbar thawain ka ylla kaba nyngkong ha u snem 1970 bad kiba kham paw nalor kitei kiba la kdew ha neng ki long u bah Hopingstone Lyngdoh bam kwai ha dwar u blei , u Salseng C Marak u ba dang don haduh mynta.

Kane ka jingpyni paidbah jong ka DIPR ia kine ki dur mynta ka sngi ka long ka lat ia ki paidbah ba kin iohi ba kumno ka myntri rangbah duh jong ka Ri India kala wan da lade sha Shillong ha ka 21 tarik kyllalyngkot 1972 ban pynbna ba la ai ia ka jylla ba pura ia ka jylla Meghalaya kaba dei ia ki Khasi bad ki Garo.

Lyngba ki baiskop kiba la pyni ha kane ka sngi la iohi ba da ki phew hajar ki paidbah kila ia poi sha madan Garrison ban sakhi ia katei ka sngi. Kane ka Madan Garrison ka hap hapoh ka jingpeit jong ki shipai ki dang pynneh pynsah ia kane ka rynsan ha katei ka jaka kaba ka Indira Gandhi ka ieng ban pynbna ia ka jylla Meghalaya ba pura.

What Next?

Recent Articles

Leave a Reply

Submit Comment

*