Pyniar ia ka tnad treikam ka seng ki nongrep ka HFU sa sha ki thain Pynursla

Shillong, Nailar 12: Mynta ka sngi, ka HFU ka la hiar sha Pynursla ban pyniar ia ka thapniang sha ka thain, ha kaba la  mynjur bad pdiang da ki nongrep ban thaw ia ka tnad ka seng.

Na ka bynta kane, la thaw ia ka kynhun ba shipor hapoh ka jingialam ne convener u bah Jurius Majaw uba dei u sordar ka shnong Mawkhap lem bad kiwei ki riew rangbah ka thain bad yn pynskhem ia ki nongkitkam shen ha kane ka taiew ban wan khnang ban pyntyllun ia ka kam shakhmat.

Shwa ia kane, ha ka jingialang kaba long ha Dorbar hall Nenggate, Pynursla, la ioh ia ka jingpynshai na ki nongialam ka HFU kynthup u president bah Commander Shangpliang, u General secretary bah Alfonsebirth Kharsyntiew bad kumjuh na u nongialam ia ki nongialam ka HFU, u Babu Kular khongjirem nalor ki nongrep bad ki nongkitkam shnong.

Haba kren ha kane ka jingialang bun ki nogrep kila pynpaw ia ka jingsngew bynnia ia ka jingshah iehbein ha ka sorkar haduh ba ka kam rep jongki, ka long kumba shu iakhalai nusip kata lada bha, ka biang bad lada sniew la bijai ei.

“Ngi shu ia rep haduh kine ki sngi kumba long ka khalai khruk khruk khlem da tip ka dor ka mur jong ki mar rep, lada bha ka iew shu kmen hynrei lada sniew la kut”, la ong uwei u nongrep na shnong Tangmang u bah Nebel sing Pariat haba kren ha ka jingialang ka seng ki nongrep ka Hill Farmers Union (HFU) ha Pynursla mynta ka sngi.

Hadien kane, u bah Commander u la iathuh ba haduh kine ki sngi, la don palat 40 hajar ngut ki nongrep ba long dkhot ha ka seng bad kan sa pyniar sa sha rilum Garo ha kine ki sngi ban wan.

Katba u General secretary bah Alfonsebirth u la ong ba ka HFU ka lum ka lang ia ki nongrep ban kyntiew ia ka rep ka riang jong ki nongrep. U la ong ba ka HFU ka mih ban iakhun ia ka jingeh ki nongrep naduh 2016 hadien ba la pynkhie im ia ka kaba la jah kumto naduh 1992.

Katba u Babu Kular uwei na ki riew rangbah ka thain, u la ong ba ka sorkar ka don ruh ka skhim ban ai tynrai soh bad ka iarap bai thung ia ki nongrep hynrei ki nongrep kim tip. U la ong ba lada ka sorkar  ka ai bai kit bai bah ia ki kontraktor kiba suplai marbam, suplai tiar, ka dei ban ai bai kit bai thung ia ki nongrep ia ki mar rep.

“Ka donkam ia ka Minimum Support Price (MSP) ia ki mar rep ban kyntiew ia ka ioh ka kamai jong ki nongrep”, u la ong.

Kine ki nongialam kila pynshai ia ki nongrep ka seng  ban ieng ban iada bad ban iakhun ia ki jingeh jong ki nongrep bad ha ka por kaba lyngkot, ka sorkar ka la shah shkor ha kaba ka la thaw ia ka Farmers Commission, ka pyllong ia ka dorbar bah ki nongrep ne ka Farmers Parliament.

 

 

 

What Next?

Recent Articles

Leave a Reply

Submit Comment

*