Shillong, Nohprah 10: Mynta ka sngi u bah Awhai Andrew Shullai MDC u la pyniasoh ia la de bad ka party TMC ha ka jingialang paidbah kaba la long ha Jowai bad ha kane ka juh ka sngi la pynbna ban long u kyrtong ban ia khun ia ka elekshon MLA, 2023 na Jowai.
Ha kane ka sngi la pdiang burom ia u MDC ka JHADC u bah Awhai Andrew Shullai sha ka party TMC ha ka jingiadon lang u Dr. Manas Ranjan Bhunia ba deipeit ia ka jylla Meghalaya, u State President, bah Charles Pyngrope, Trinamool Congress Legislature Party Leader u nongialam ka liang pyrshah u Dr. Mukul Sangma.
Ha ka jingkren u Dr. Mukul Sangma la ong ba ia ka B.Ed college ha Jowai haduh mynta ym pat lah banpyntrei kam, la ong ba lada ka TMC kan wan ha ka bor ha u snem 2023 ha u bnai ba nyngkong kin pyntrei kam noh ia kane ka college. Ha kane ka jingialang u nongialam ka liang pyrshah u la kythoh pyrshah ia kane ka sorkar ha kiba bun ki liang.
Ha kane ka sngi u Dr Mukul la ong ba hapoh kane ka sorkar MDA kaba la ialam da ka NPP la kynnoh ba ia ki kam ki jam la tyngngian tang ha ki kato katne ngut ki briew bad bun ki briew kila duh ia ki kam ki jam.
Ha ka jingkren u bah George B Lyngdoh MLA, la ong ba ki paidbah kane ka jylla Meghalaya kila duh jingshaniah ha kane ka sorkar MDA kaba la ialam da ka NPP, u la ong ba kane ka elelction kala ha khmat u khot u wer ia ki paidbah ban ai ka jingkyrshan ia u bah Andrew.
Ha ka jingkren u bah Awhai Andrew Shullai u la ong ba ma u marwei shimet yn nym lah ban leh ei ei hynrei don kam ia ka jingiatreilang da baroh,la ong ba u don ka jingkut jingmut ba wan rah ia ka jingkylla hapoh ka Konstitwensi, hakane ka sngi kila don ruh kiwei kiwei ki nongialam ka party ban ia sakhi lang.
