Shillong, Nailur 19: U Bah Khrang Lyngkhoi u wei na ki nogialam jong ka seng UDP u ba la juh ia khun ia ka MLA bad Election MDC na ka Langrin Constituency ha kine ki snem kiba la leit noh bad mynta la tip kum ka Ranikor Constituency, mynta ka sngi bad ki nongbut jong ki leit ban pyniasoh ia lade bad ka seng Congress Constituency.
Haba kren ha ki lad pathai khubor ha dien ba la pdiang ia u bad ki nongbud sha ka seng Congress da u president jong ka Ranikor BCC ha ka jingiadonlang u MLA u Martin M Danggo bad ki nongialam ka party u Bah Lyngkhoi u la ong ba ka jingrung ka jong ki sha ka seng Congress ha dien ba u la don bun snem ha ka sian pyrthei, u iohi ba dei tang ka party congress kaba lah ban ai ia ka jingsynshar ha kane ka Ri bad ka jylla.
Ka daw jong ka jingmih noh ka jong u bad ki nongbut jong u na ka seng UDP ka long ba ki nongialam jong ka party UDP kim sngap ia ka jingkren ki briew na ka Constituency. Kaei kaba la jia ha Ranikor Constituency ka long ba ka jingiathut ka long ha ka MDC Election 2014 ka party kam shym la sngap ia ki nongtrei party ha kaba ai ia ka tiket bad ha kane ki la pynieng ia u Bah Airmarshal Dieng kum u kytong shimet ha kaba u la wan ba ar.
Naduh u snem 2014 ma u bad ki nongbud jong u kim shym la leit sha ei sha ei hynrei mynta kila rai ha ka jingialang ka jong ki ba kin ai noh ka jingkyrshan ia u MLA ba mynta u Martin M Danggo u ba u juh ia leh pyrshah ha ki election kiba la dep bad u ong ba da kane ka jingkyrshan kane ka kynhun ka jong u kan dang wanrah ruh ia ka jingjop kaba don burom ha u snem 2018 kum u MLA na katei ka jaka.
U la pynkynmaw ba ha man ki Election kiba u ia khun pyrshah u juh wan ba ar da kaba ioh vote palat ia ka 7000 vote bad ha u snem 2013 kila pyniakhun ia u Bah P K Raswai bam kwai ha dwar u blei da ka jingkyrmen ba kin jop hynrei kila shah rem da 465 vote bad mynta da ka jingpyniasoh kane ka kynhun sha ka seng Congress ka long ka lynti ban pynjop don burom ia u MLA ba mynta na ka party Congress.
