Shillong, Iaiong 05: Ki 10 kur kiba hap hapoh jong ka Rikhain Nonglynkien ha ka 2 tarik Iaiong, 2022 ki la pynlong ia ka jingiakynduh lang bad ki la shim ia ka rai ban pynim biang ia ka jingiateh kular jong ki 10 kur kaba la long naduh u snem 1949 kaba hap hapoh jong ka South West Khasi Hills District.
Napdeng kine ki 10 kur ki kynthup ia ki 2 kur kata ka Kur Sangriang bad ka Kur Lyngdoh Umiong bad ki 8 kur pat ki kynthup ia ka kur Mawlein, Shangpliang, Pariongbah, Nonglang, Kharjahrin, Lyngkhoi, Myrthong bad pariongnah.
Da ka jingiamynjur lang kine ki 10 kur ki la rai ban bud ia ki kyndon jingiateh kular kaba naduh u snem 1949 ryngkat ka jingpynkylla kaba malu mala katkum ka juk kaba mynta.
La shim ruh ia ka rai ban jied ia ki nongkitkam jong ka Rikhain Nonglynkien ha kaba la jied Chairman ia u Bah Dominic Shangpliang bad Secretary ia u bah Kwosterly Sangriang, nalor bun kiwei pat ki nongkitkam lem bad ki ki dkhot jong ka Executive Committee.
Ha kane ka sngi la pule ruh ia kot jingithuh lane pynskhem na u Syiem ka Hima Maharam (NOC). Ha kane ka sngi la ioh ba pynskhem ruh ia ki nongkitmam jong ka Committee da ka jingmynjur lang jong ka Dorbar 10 kur bad la shim ruh ia ka rai ban shanniah ha ka Committee na ka bynta ka bha ka miat bad ban pyntyllun ia ki kam jong ka Rikhain Nonglynkien.
Na ka liang jong ki paidbah 10 kur ki la pynpaw ia ka jingsngewkmen halor ka jinglah jong ki Rangbah ban lum biang bad ban tehsong kumba la ialam bad btien lynti da ki nongialam ba mynshuwa jong ki 10 kur. Kane ka long katkum ka kyrwoh khubor na u bah Commander Shangpliang Publicity Secretary 10 kur Rikhain Nonglynkien.
