Shillong, K.Lyngkot 03: Ka Deputy Commissioner jong ka East Khasi Hills District ka kong Isawanda Laloo mynta ka sngi kala pynjari ia ka kyndon 144 CrPC ban khang pyrshah ia ka jingluh dohkha ha kiwah kiba don ha kylleng jong ka District.
Haba pynjari ia ka kyndon 144 CrPC, ka DC kala pynpaw ba la ioh jingtip ba ki don ki briew kiba la pynbethei da ki Dainamait, pyndon kam da ki jar, da kaba luh da ki dawai ba long bih ban pyniap ia ki dohkha ha kine ki wah kum ka ka wah Umngot, wah Umlow bad wah Umngi.
Ka wah Umngi ka dei kaba wah kaba tuid lyngba bun bah ki shnong kum ka Kenbah, Kenmynsaw, Domskong kiba hap hapoh jong ka thain syntein, Mawrapat, Mawsawa Mawkasain, Kenbah Malai, Phlangwanbroi, Kynrang, Rangweng, Pyndensohsaw, Jyllep, Khiehriat, Pomblang, Laitumsaw, Dangar, Dangar Dop, Umsawrang, Photstein, Umlynter, Lalpani and Pynden Borsora.
Kitei ki wah bad ki shnogn ki hap hapoh jong ka East Khasi Hills District, na ka liang jong ka DC kala ong ba kane ka jingpyniap pathar ia ki dohum dohwah bad ka jingpyndon kam ia ki dawai kan ktah ruh ia ka jingim briew kiba don sawdong jong kitei ki wah.
Kane ka jingpynjari ia kane ka kyndon 144 CrPC kan treikam naduh mynta ka sngi bad la da lap iano iano kiba leh pyrshah ia kane ka jingkhang na ka ophis jong ka DC yn pynshitom ia ki briew katkum ka ain, la ong ba ka DC East Khasi Hills District.
