Shillong, Jymmang 30: U Chief Executive Member jong ka Khasi Hills Autonomous District Council u bah Titosstarwell Chyne u la ong ba ka ophis kala pynjlan haduh ka sngi ba ar ban phah iaki aplikoshon na ki Community Quarantine Centre (CQC) ba peit da ki shnong.
Haba kren ha u SP News Agency mynta ka sngi u la iathuh ba la ioh shibun ki aplikoshon hynrei namar ba ki dang don kiba khlem pat lah ban pynpoi la hap ban pynjlan ia ka por haduh ka sngi ba ar ei ei khnang ba kito kiba khlem pat ioh ban phah kin ioh ban phah.
U CEM jong ka KHADC u la iathuh ba ki aplikoshon kila bun kiba la ioh pdiang da ka ophis hynrei ym pat niew katno phew tylli ki don namar ba ki dang hap ban pynjlan ia ka por wat na pdeng ki para MDC ruh kila kyrpad ban pynjlanlem ba kin ioh ban phah ia ki aplikoshon.
Ka KHADC ka kwah ban iarap pisa ia kito ki Quarantine Centre kiba la buh da ki dorbar shnong kum shibynta ban ianoh syniang lem sha ki dorbar shnong na ka liang jong ka KHADC ha kaba ia leh pyrshah ia kane ka kkhlam COVID-19.
