Shillong, Jymmang 31: Ka Hynniewtrep Youths’ Council ka lah ioh ban pynkha sa kawei ka Tnat treikam ka jongka hapoh kane ka Bri Hynniewtrep. Ia kane ka Tnat la pynskhem ha ka 30 tarik u Jymmang, 2019 hapoh ka Shnong Lawsohtun, Shillong bad tip ia ka kum ka HYC Lawsohtun Unit ha kaba da ki phew ngut ki samla jong ka Shnong Lawsohtun ki lah wan ban pyniasoh ialade sha ka Seng ha kane ka sngi.
Ia ka jingialang ban pynskhem bad pyntiansmai ia ki nongkitkam jong kane ka Unit thymmai lah pynlong ha Community Hall jong ka Dorbar Shnong Lawsohtun ha ka janmiet jong ka sngi Palei ha ka jingdon ryngkat U Rangbah Shnong bad Secretary ka Dorbar Shnong Lawsohtun, ki Executive Member jong ka Shnong, ki Rangbah Dong bad nongkitkam jong ki Dong Bapher bapher jong ka Shnong Lawsohtun, ki Riew Rangbah jong ka Shnong bad ki shnong ba hap hapoh ka Raid Laban ha ryngkat ki Nongkitkam jong HYC CEC bad ruh ki dkhot napoh Shillong City.
Ia ka jingialang la pyniaid da u Samla Francis Gee Mawlong, Organising Secretary, CEC bad lah ioh ka jingkren pdiang da u Samla Beverly Marbaniang. Na ka liang ka shnong lah ioh jingkren na u Rangbah Shnong ka Dorbar Shnong Lawsohtun u ba la ai ia ki kyntien sneng kraw bad kyrkhu kyrdoh ia ki khun samla jong ka Shnong kiba rung sha ka Seng HYC bad kyntu ruh ia ki ba kin nang trei bha ban kyntiew ia ka imlang.
Ia ka bynta ban pynsmai bad pynskhem ia ki nongkitkam jong kane ka Unit Thymmai jong ka Seng la shim da u General Secretary ka Seng Kmie u Samla Rangbah Roy Kupar Synrem uba la pule ha kine ki dkhot ba thymmai jong ka seng ia ki kyntien smai bad kyntien kular katkum ka Riti pyniaid kam jong ka Seng ha kaba shuwa ban long ki dkhot ba pura ki hap ban shim ia ki kyntien smai bad kular hakhmat ka Ri bad ka Jaidbynriew ba kin trei hok ban shakri ia ka lyngba ka seng Hynniewtrep Youths’ Council.
Ha kane ka jingialang la pynskhe m ia u Bah Aiborlang Lyngdoh kum u president, u Vice Presidents bah Keddy Gashnga bad Rejoice Nonglait, u General Secretary u Bah Aniston Lynshiang, na lor jong ki la don ruh kiwei kiwei ki nongkit kam bad ki dkhot jong ka ekskutip kommitti.
