Khliehriat, Nohprah 12:Ki nongialam ka Seng FKJGP-South Eastern Border Area (SEBA) Circle hapoh ka jingialam u President,Ma Mathew Pajat bad u Assistant Secretary,Bah Kymmo Patwat ki la leit hiar sha ka Shnong Lama kum shi bynta ban pynkhlain shuh shuh ia ka jingtreikam ka Seng da kaba pynkha ia ka tnad treikam ba thymmai jong ka Seng ha ki thain khappud ka Elaka Rymbai & Lakadong da kaba la ioh ban pynkha ia FKJGP Lama Unit.
Ia kane ka Unit ba thymmai jong kane ka Seng ba la slem bha hapoh ka Jylla Meghalaya la pynskhem ha ka 11/12/20 ha ing skul Lama Govt.LP School da jingpyntian smai da u Bah Kitboklang Nongphlang Chief Organiser jong ka FKJGP Sengkmie Shillong u ba dei ruh ban khmih ia ka Ri lum Jaintia baroh kawei.
La sakhi lang ruh da ki dkhot ka FKJGP-CEC kiba kynthup ia u Bah Danny Nongrum bad Ma Alfred Kharumnuid bad ha ka jingiadonlang u Bah Nabait Ymbon uba dei ruh u President FKJGP-West Jaintia Hills District bad kumjuh ruh ki nongialam ka FKJGP East Jaintia Hills District naduhh u Bah Alphrin Dkhar, Adviser,Bah Merald Suting, President,Bah Welking Swer,Vice President,Bah Deihok Sumer, General Secretary bad kamjuh u Bah Ying Siangshai.Ki nongkitkam ka FKJGP Bataw Unit ki la lah ban iadonlang hapoh ka jingialam khmat u rangbah Bilis Pyrtuh, Adviser ka FKJGP Bataw Unit ryngkat u Bah Ampli Rupsi General Secretary.
Ia ka jingialang la pyniaid da u President FKJGP-SEBA Circle,Bah Mathew Pajat bad la ioh ruh ia ki kyntien kynpham na kiba bun ki nongialam ka Seng ha kane ka Sngi kumjuh u Waheh Shnong Lama,Bah Tellme Dong u la iadonlang ryngkat bad ki nongshong Shnong ka Shnong Lama.
Na ka liang u Organising Secretary jong ka FKJGP- SEBA Circle,Samla Omega Sumer u la ai ki kyntien sneng kyntien kraw ia ki samla kane ka Shnong ba kin long kiba don ka akor ka burom bad lyngba ka Seng FKJGP kum ki dkhot kin long ka jingmyntoi ia ka Shnong Lama bad ka kam jong ki kan long kum ka kyrteng ki sengbhalang ha ka jingtreikam na ka bynta ka jingmyntoi ka Shnong Lama,ka thain,ka Ri bad Jaidbynriew hi baroh kawei.
Na ka liang u Samla Rangbah Bah Kitboklang Nongphlang u ong ba katno ngi dap da ka jingsngewsih kaba khraw ba ka Jaidbynriew jong ngi ka sahdien haduh katta katta khamtam ngim pat don ia u pud u sam ba thikna boon ki liang khamtam ia u pud u sam ba thikna watla ka jingiohpdiang ia ka Jylla Meghalaya naduh u u Snem 1972 kaba khlem pud khlem sam.
U pynkynmaw ruh ba ka jingiaid lynti ki khun Isreal na Ri Ijipt sha ri Kanaan ka shimpor da ki 40 snem ha ka jaka ban leit tang 40 sngi tang namar ka jingleh pop bad kumjuh ka Jylla jong ngi kam pat lah ban ioh ia u pud u sam uba thikna tang na ka daw ba ki nongialam bad ki nongsynshar jong ngi ki la leh pop bad ki synshar arsap ia Jylla baieit jong ngi ong une u nongialam ka FKJGP.
