Shillong, Lber 12: Ki shipai BSF ha kine ki ar sngi kila ioh ban bat haduh 96 tylli ki masi kiba la thmu ban shallan tuh sha Bangladesh na ki bynta bap her bapher jong ka jylla ha khappud bad ka thie ka Ri bad kane ka jingkhaii tuh kala jyllei bha na ki thain Miringgipara jong ka South West Garo Hills District.
Haba ki shipai BSF bad ki pulit jong ka Ampati kila iohi ba ki don ki briew kiba la niah ia ki masi sha khlaw ha Miringgipara kila ker kut ia kane ka jaka bad ha ka jingdum jong ka suin bneng ki nongkhaii masi kila ioh ban phet hynrei ki pulit bad ki BSF kila ioh ban bat haduh 65 tylli ki masi na katei ka jaka.
Nalor katei ka jaka ki BSF kila ioh ruh ban kurup ia ki masi na Iew Thymmai ha East Khasi Hills, Rachanagiri jong ka West Garo Hills bad Shibari jong ka South Garo Hills, nalor ki masi la ioh ruh ban kurup haduh 366 bilor ka kyiad ban thmu ban shallan sha Bangladesh.
Ki shipai BSF mynta kin kiew ia ka jingkhynra masi sha ki bynta ba kham sha neng na khappud ban khanglad ia kane ka jingpynpoi ia ki Masi sha khappud bad ka Bangladesh. Ha kine ki lai sngi ki BSF kila ioh ban kurup haduh 62 lak tyngka ka mar khaii tuh ba thmu ban phah sha Bangladesh ha khappud.
